O PSdeG-PSOE aposta pola unidade e critica ao PP por fomentar a confrontación nos incendios
O Grupo Provincial Socialista defendeu unha posición de colaboración no pleno extraordinario da Deputación de Ourense convocado a raíz dos incendios que arrasaron boa parte da provincia. O seu voceiro, Álvaro Vila, insistiu en que o momento require unidade e traballo conxunto, fronte ao discurso de confrontación política que, segundo dixo, o Partido Popular tratou de impor a través da súa voceira, Patricia Torres.
“É unha mágoa que o PP ourensán asuma a estratexia de Feijóo a nivel estatal, cando o que precisa a provincia é consenso e responsabilidade”, indicou Vila, quen lamentou que o debate se centrase en ataques partidistas en lugar de en solucións reais. O socialista puxo en valor o esforzo de alcaldes, alcaldesas, veciñanza e efectivos de emerxencia que loitaron “na primeira liña contra o lume” mentres, ao seu xuízo, na cámara provincial algúns preferiron “postureos políticos”.
Vila recordou que até 42 concellos sufriron as consecuencias dos lumes e advertiu das contradicións internas do propio PP. Como exemplo, citou as declaracións recentes do xefe de emerxencias da Deputación, quen asegurou que había medios suficientes e que a única solución era esperar a que chovese. “Unha postura que entra en conflito co discurso oficial e que evidencia a falta de coherencia interna”, apuntou o socialista.
O voceiro tamén denunciou a ausencia de autocrítica no grupo popular. “Non se pode presumir de eficacia cando existen graves deficiencias na prevención e xestión dos incendios”, afirmou. Para reforzar este argumento, lembrou que o Diario Oficial de Galicia publicou esta semana unha oferta para cubrir 327 prazas vacantes de bombeiros forestais, o que, ao seu entender, pon de manifesto as carencias estruturais do sistema.
Durante a sesión, Vila avanzou que o Grupo Provincial Socialista está a traballar nun plan integral con 50 medidas concretas para mellorar a prevención, a xestión e a recuperación tras os incendios. “Mentres uns se dedican a xerar ruído, nós presentamos propostas serias e viables”, destacou, ofrecéndose a compartir esas iniciativas co grupo de goberno.
O pleno serviu tamén para a toma de posesión de dous novos deputados do PSdeG-PSOE. Sherezade Núñez, tenente de alcalde en Vilamartín de Valdeorras, e Xosé Carlos Valcárcel, alcalde de Barbadás, incorporáronse en substitución de Elvira Lama, ex rexedora de Xinzo de Limia, e Aurentino Alonso, quen asumirá a alcaldía do Barco de Valdeorras nos próximos días.