O PSdeG-PSOE de Ourense esixe a recuperación inmediata de frecuencias ferroviarias na Gudiña
O PSdeG-PSOE de Ourense sumouse este sábado á manifestación convocada pola Plataforma Dereito ao Tren na Gudiña, que reuniu a milleiros de persoas na defensa dun servizo ferroviario digno para o oriente da provincia. A mobilización, que percorreu o traxecto entre a Estación Vella e a nova estación Porta de Galicia, contou coa presenza do secretario provincial socialista, Álvaro Vila, así como de numerosos alcaldes e representantes da formación nas comarcas afectadas polos recortes de frecuencias.
Álvaro Vila destacou o éxito da convocatoria e sinalou que "a cidadanía do rural ourensán pronunciouse alto e claro" e pediu que a súa mensaxe sexa escoitada polas administracións. Segundo afirmou, o PSdeG-PSOE acudiu "non como partido, senón como veciños que defenden o futuro das súas comarcas", apoiando as demandas da plataforma convocante.
Durante a manifestación, reclamouse a recuperación inmediata de frecuencias ferroviarias e a adecuación dos horarios da estación Porta de Galicia ás necesidades reais da poboación. Para o PSdeG-PSOE, estas reivindicacións responden a cuestións prácticas como poder desprazarse a Madrid e volver no mesmo día, asistir a citas médicas ou facilitar os desprazamentos dos estudantes.
Tamén participaron na mobilización representantes socialistas de concellos como Verín, Laza, Riós, A Mezquita, Viana do Bolo, Petín, Vilamartín ou O Barco de Valdeorras, así como cargos electos en Galicia e nas Cortes. A nivel galego, asistiu tamén a secretaria de organización do PSdeG-PSOE, Lara Méndez.
O secretario provincial advertiu das consecuencias que a falta dun servizo ferroviario axeitado pode ter para o rural ourensán, desde o illamento territorial ata o impacto económico para moitas familias. Subliñou que “non se piden privilexios, senón conexións útiles que garantan a igualdade de acceso aos servizos”.
A manifestación deixou patente un amplo respaldo social ás demandas da Plataforma Dereito ao Tren, consolidándose como unha das maiores mobilizacións recentes na provincia en defensa dos servizos públicos no rural.