O PSOE de Ourense reuniu a 50 mulleres para abordar os retos actuais do feminismo
A Agrupación Municipal Socialista de Ourense organizou un encontro no que participaron a secretaria de Economía da Executiva Federal do PSOE, Enma López; a secretaria de Organización do PSdeG, Lara Méndez; e a secretaria xeral do partido na cidade, Natalia González. A xuntanza reuniu a 50 mulleres da sociedade ourensá procedentes de ámbitos como o empresarial, o sindical, o deportivo, o educativo e o asociativo, co obxectivo de compartir experiencias e analizar os desafíos máis urxentes para o movemento feminista.
Baixo o lema “50 anos, 50 voces feministas”, as participantes coincidiron na necesidade de seguir impulsando avances nos eidos educativo, laboral e lexislativo. Ademais, alertaron do retroceso que supoñen os discursos de odio e machistas que, segundo sinalaron, buscan frear o progreso acadado polas mulleres ao longo dos últimos 50 anos de democracia.