O PSOE demanda ao presidente da Deputación de Ourense que manteña a posición unánime sobre Gaza
O Grupo Provincial Socialista vén de esixir explicacións ao presidente da Deputación de Ourense, Luís Menor, sobre se mantén a valoración aprobada por unanimidade no pleno da corporación respecto da situación en Gaza. A deputada Marina Vaz reclama aclaracións sobre se o presidente segue considerando os feitos como "xenocidio" e "auténtico intento de limpeza étnica", tal como se aprobou en xuño do 2024 con todos os grupos representados, incluído o PP provincial.
Vaz lembra que naquela votación histórica, “sen unha soa abstención nin voto en contra”, a Deputación denunciou que "estamos a asistir á metódica exterminación dos palestinos" e que "os palestinos son deshumanizados por parte de Israel que está a protagonizar un auténtico intento de limpeza étnica, de xenocidio, protagonizando unha particular Shoah contra o pobo palestino". A deputada destaca que esta posición cobra maior relevancia agora que as vítimas civís superan os 65.000, case duplicando as cifras do momento da aprobación da moción.
A socialista sinala a contradición coa posición do PP estatal, que cuestiona a competencia da ONU para determinar xenocidio, mentres o PP ourensán apoiou por unanimidade a moción provincial. Vaz subliña que esta incoherencia convértese en máis grave cando dirixentes nacionais do PP, como Alberto Núñez Feijóo, chegan a responsabilizar ao Goberno de España polas mortes en Gaza.
“Os cidadáns ourensáns teñen dereito a saber cal é a posición real da formación que goberna esta institución”, declarou Vaz, quen demanda claridade sobre “se o PP provincial mantén a coherencia coas posicións aprobadas por unanimidade ou se subordina as súas conviccións humanitarias ás directrices que poidan chegar desde Madrid”. Para a deputada, "a defensa da dignidade humana e a condena dos crimes contra a humanidade constitúen principios irrenunciables que non admiten oportunismos políticos".
O informe da ONU sobre Gaza ratifica a posición da Deputación: a Comisión Internacional Independente de Investigación das Nacións Unidas conclúe que "Israel ten cometido xenocidio contra os palestinos en Gaza desde o 7 de outubro de 2023", cumprindo catro dos cinco criterios legais establecidos pola Convención Internacional de 1948. Vaz destaca que “o informe da ONU ratifica a valoración que esta Deputación xa realizou de forma unánime” e asegura que “a coincidencia entre a nosa avaliación política e a conclusión xurídica dos expertos internacionais confirma o acertado da posición adoptada por unanimidade”.
A deputada tamén insta a Menor a clarificar se recoñece a competencia das Nacións Unidas para determinar a existencia de crimes contra a humanidade e a comprometerse a manter a coherencia coa moción aprobada, lembrando que "máis de 65.000 civís, incluíndo miles de nenos e mulleres, perderon a vida nun conflito que esta corporación cualificou no seu momento como xenocidio e intento de limpeza étnica".