O Salón da Prevención e Seguridade Laboral, Previsel 2026, regresa a Expourense
O Salón da Prevención e Seguridade Laboral, Previsel, celebrará a súa 19ª edición os días 11 e 12 de marzo en Expourense, cun amplo programa de formación especializada en materia de prevención de riscos e saúde laboral. A cita contará con máis de 50 actividades entre xornadas técnicas, seminarios e obradoiros impartidos por expertos.
A programación foi elaborada coa colaboración de administracións, patronal, sindicatos, colexios profesionais, servizos de emerxencias e centros educativos de Formación Profesional, que participan nun evento consolidado como referente en Galicia no ámbito da prevención laboral. O salón contará tamén cunha área expositiva con 40 entidades que presentarán produtos, servizos e iniciativas relacionadas coa seguridade no traballo.
A presentación desta edición tivo lugar este luns en Expourense coa participación do delegado territorial da Xunta en Ourense e presidente do comité executivo de Expourense, Manuel Pardo; do vicepresidente terceiro da Deputación de Ourense, Plácido Álvarez; do director do centro do ISSGA en Ourense, Ángel López; do presidente de TESGALICIA, Santiago Moreno; e do director xerente de Expourense, Rogelio Martínez.
O programa inclúe actividades dirixidas a sectores profesionais concretos e tamén sesións divulgativas abertas ao público sobre prevención, saúde laboral ou primeiros auxilios. Entre os temas que se abordarán figuran a análise do novo Regulamento de Seguridade contra Incendios, a prevención de neglixencias en incendios forestais, a xestión da seguridade en catástrofes ou fenómenos meteorolóxicos adversos, a preparación da mochila de supervivencia ou as oportunidades laborais no sector da construción.
O Instituto de Seguridade e Saúde Laboral de Galicia (ISSGA) participará cun seminario sobre a “Prevención de riscos ergonómicos e psicosociais na atención a persoas dependentes” e outra xornada dedicada ao traballo seguro con nanomateriais. Ademais, unha das novidades desta edición será a presenza da Axencia Galega de Emerxencias (AXEGA) cunha bomba de achique de gran caudal.
A programación complétase coa participación de entidades profesionais, sindicatos e servizos de emerxencia. Entre outras actividades, UGT organizará obradoiros sobre a preparación da mochila de supervivencia para as primeiras 72 horas tras unha catástrofe; CC.OO. impartirá un seminario sobre enfermidades profesionais; e a CIG ofrecerá unha xornada sobre prevención e seguridade dos traballadores ante fenómenos meteorolóxicos adversos. Tamén haberá talleres prácticos como o de manexo de extintores impartido polos Bombeiros de Ourense.
No ámbito sanitario, o sindicato SATSE organizará obradoiros especializados sobre accesos vasculares e terapias intravenosas, mentres que TESGALICIA coordinará unha vintena de actividades dirixidas a profesionais sanitarios e ao público xeral, entre elas talleres de reanimación cardiopulmonar e a visita do helicóptero medicalizado H4.
O evento contará ademais con exposición de equipamentos e vehículos de emerxencia achegados por distintas entidades, entre elas a Deputación de Ourense, Protección Civil, Cruz Vermella, SAMUR, SUMMA 112, BRILAT, Policía Nacional ou o 061 Galicia.
Previsel 2026 conta co apoio principal do ISSGA e coa colaboración da Deputación de Ourense, da Dirección Xeral de Emerxencias e Interior da Xunta de Galicia e de Renfe. A asistencia ás actividades é gratuíta, con inscrición previa a través da web do salón.
O horario de apertura será o mércores 11 de marzo de 10.00 a 14.00 e de 16.00 a 19.00 horas, e o xoves 12 de marzo de 10.00 a 14.00 horas.