O Salón do Vehículo Clásico de Ourense pecha a súa cuarta edición cun gran éxito de visitantes
O Salón do Vehículo Clásico de Ourense celebrou esta fin de semana a súa cuarta edición cunha notable afluencia de público, acadando arredor de 8.000 visitantes ao longo dos dous días. O evento, xa consolidado no calendario do motor clásico, reuniu afeccionados, expositores e propietarios de vehículos históricos no recinto de Expourense, con máis de 60 empresas participantes e unha exposición que superou os 450 vehículos clásicos chegados de forma particular.
Durante a clausura da cita entregáronse os premios do 3º Concurso de Elegancia, que distinguiu dous vehículos segundo a súa época. Na categoría de coches anteriores a 1970, o galardón foi para un Cadillac Eldorado de 1959 propiedade de Rubén Rodríguez. Na franxa posterior a ese ano, o premio recaeu nun Porsche 944 de 1982 de Íñigo Vila. Ademais, o premio do público, decidido a través das votacións nas redes sociais, foi para un Alpine A310 de Jonathan Suárez.
A programación incluíu tamén outros recoñecementos e actividades paralelas. No concurso “O meu clásico de portada”, os premiados foron Carlos Martínez cun BMW 918 IS E30 de 1990, Adrián Díaz cun Volkswagen Golf MK3 GTI 16v ABF de 1994 e Manolín Cagiao cun Nissan Bluebird Grandprix de 1987. Pola súa parte, a III Copa de Lent@s en Moto, organizada xunto ao club Avispados de Ourense, coroou a Mikel Nieto e Lisardo Conde.
Un dos momentos máis seguidos foi a final do campionato de simracing de clásicos, con 190 participantes e narración en directo. A proba, disputada no circuíto virtual Dragon Trail Jardines de Croacia con Fiat Panda Rallye de 99 CV, rematou coa vitoria de Diego López, de Vigo.
O programa incluíu tamén unha ruta de clásicos polos arredores de Ourense, con visita ao Claustro de San Francisco, na que participaron arredor de medio centenar de vehículos. Ademais, diferentes clubs realizaron encontros e concentracións, como o de afeccionados a Alfa Romeo e a conmemoración do 50 aniversario do Mercedes-Benz W123.
A organización xa confirmou a próxima edición do salón, que se celebrará en abril de 2027, mentres que a actividade feiral en Expourense continuará a vindeira semana co VIII Car Outlet Ourense, previsto do 17 ao 19 de abril.