O Samaín chega a Celanova con actividades para toda a familia
A vila de Celanova prepárase para celebrar o Samaín da man da Asociación de Comerciantes, Hostaleiros e Empresarios da vila (Celanova CHEA), que ofrece varias propostas para os próximos días.
As actividades deron comezo este pasado sábado cun obradoiro infantil de Samaín e continuarán o 31 de outubro co Rincón do Medo, onde un maquillador profesional preparará aos asistentes para a noite máis terrorífica. A continuación, os participantes poderán desfrutar dun Túnel do Terror, organizado pola Asociación de Comadres de Calanova en colaboración con Celanova CHEA, que estará aberto en dúas quendas, ás 21:30 e ás 22:30 horas.
Ademais, durante esa mesma tarde, os pequenos poderán participar no “truco ou trato” nos comercios asociados, onde recibirán un agasallo doce para celebrar a tradición de Samaín.