O sector da construción de Ourense acorda as subas salariais para 2025 e 2026
A Comisión Paritaria do Convenio Provincial da Construción de Ourense aprobou as novas táboas salariais e as achegas ao plan de pensións para os anos 2025 e 2026, en aplicación do VII Convenio Xeral do sector. A actualización supón un incremento global do 8,05 % entre salarios e contribucións ao plan de pensións durante este período.
Sobre as táboas vixentes aplicouse primeiro a cláusula de garantía salarial do 0,4 %, derivada da evolución do IPC dos tres últimos anos. A partir de aí, o salario medrará un 3,5 % desde o 1 de xaneiro de 2025 e un 3 % desde o 1 de xaneiro de 2026. As empresas poderán aboar os novos importes, así como os atrasos, desde o momento da sinatura, cun prazo máximo dun mes tras a súa publicación no Boletín Oficial da Provincia.
O acordo tamén actualiza as achegas empresariais ao Plan de Pensións Sectorial: en 2025 engadirase un 0,4 % asociado á garantía salarial máis un 0,5 % adicional, mentres que en 2026 se aplicará un incremento extra do 0,25 % sobre o salario. Ademais, elimínase a excepción que permitía a determinadas entidades promotoras quedar exentas de contribuír ao plan; desde o 1 de xaneiro de 2026 todas as empresas estarán obrigadas a realizar achegas para as persoas traballadoras que sexan partícipes, excepto nos casos de suspensión ou interrupción contractual previstos por lei.
Finalmente, a Comisión fixou no 0,35 % a cota correspondente á Fundación Laboral da Construción para o exercicio 2025, mantendo os tipos e recargos establecidos na normativa da Seguridade Social.