O subdelegado do Goberno, Eladio Santos, insiste en que Ourense é unha provincia segura
Nas xuntas locais de seguridade, que se veñen celebrando cada seis meses, queda constancia dos baixos índices de delitos na nosa provincia, sinalan desde a Subdelegación do Goberno de Ourense. "Fronte a informacións recentes e declaracións de representantes políticos nos medios de comunicación", o subdelegado fai fincapé en que os delitos que teñen que ver coa usurpación de bens inmobles ou o delito de violación de morada, non representan un problema de convivencia e son irrelevantes ou inexistentes na provincia e na capital.
Eladio Santos chama a non crear falsas alarmas entre os veciños e ser rigorosos e prudentes nas declaracións e informacións sobre os temas de seguridade e convivencia. “Son asuntos moi sensibles para a os cidadáns e deben ser tratados con rigor, información veraz e seriedade. É censurable utilizar as cuestións de seguridade como ferramenta para a propaganda política”, afirma, ao tempo que lembra que se está poñendo en cuestión o traballo e a profesionalidade das Forzas de Seguridade.
Nas xuntas locais de seguridade están presentes representantes das institucións públicas, forzas de seguridade e tamén, no caso da capital, asociacións de veciños e comerciantes, e nelas ofrécese información, documentación e datos sobre as cuestións de seguridade. “As conclusións son ben claras neste sentido”, lembra.
Ocupación de bens inmobles
A Subdelegación do Goberno en Ourense mantén contacto permanente coas asociacións de veciños para abordar as súas necesidades particulares, exemplo disto é a reunión que esta mañá mantivo o subdelegado con veciños da Ponte para atender as súas preocupacións e á que tamén asistiu Nuria Palacios Ibán, comisaria xefa accidental da Policía Nacional.
Entre os temas abordados na xuntanza atopáronse as ocupacións de bens inmobles. A este respecto, os datos na cidade neste ano son os seguintes: oito denuncias de inmobles usurpados na capital e ningunha denuncia por invasión en vivendas habituais ou segundas residencias. Ademais, aseguran que todas elas seguen o mesmo patrón, trátase de inmobles en mal estado e abandonados, e prodúcese a ocupación sen violencia. Tan só unha destas denuncias se atopou vinculada á comisión de delitos contra a saúde pública, que a día de hoxe está desarticulado.
No tocante á provincia, os números son similares. Segundo a datos que constan nesta Subdelegación, producíronse 3 ocupacións de vivendas na provincia (excluída a capital) ao longo do 2024. Concluíndo que a incidencia desta modalidade delitiva é practicamente nula.
Para finalizar, o subdelegado do Goberno insiste en que desde a Subdelegación “ofrécese información sobre temas de seguridade a asociacións, institucións, medios de comunicación e cidadáns da provincia coa finalidade de abordar estes asuntos con rigor, responsabilidade e sen alarmismos innecesarios, que o único que conseguen é sementar preocupacións sen fundamento entre os veciños”.