Os centros educativos da cidade de Ourense reciben os premios pola participación na San Martiño
O alcalde de Ourense, Gonzalo Pérez Jácome, e o concelleiro de Deportes, Aníbal Pereira, fixeron entrega este mércores dos premios aos centros educativos que destacaron pola elevada participación do seu alumnado na 48ª Carreira Pedestre Popular do San Martiño, celebrada o pasado 9 de novembro. Ambos agradeceron a implicación dos colexios e institutos nunha edición que volveu rexistrar cifras moi altas en todas as categorías.
Segundo as bases da convocatoria, o Concello concede 120 euros en material deportivo a cada centro que lograse clasificar un mínimo de 25 deportistas. Ademais, os seis colexios de Primaria e os seis institutos de Secundaria con maior presenza na proba recibiron premios adicionais, con importes que oscilan entre os 100 e os 300 euros.
Na competición Sub12 e Sub10 participaron 28 centros, dos que 21 superaron a porcentaxe mínima. O CPR María Auxiliadora Salesianos foi o que máis alumnado achegou (125 participantes), seguido moi de preto por Carmelitas (124). Tamén destacaron o CEIP Prácticas e o CEIP Mestre Vide, ambos con 84 deportistas, así como o CEIP A Ponte (79) e o CEIP O Couto (71).
Pola súa banda, nas categorías Sub18, Sub16 e Sub14 estiveron representados 25 centros, con 19 deles acadando máis de 25 deportistas clasificados. O IES As Lagoas encabezou a participación con 226 alumnos e alumnas, seguido polo IES O Couto e o Colexio Divina Pastora, ambos con 170. Completaron a listaxe dos máis numerosos o IES Blanco Amor (160), o IES Otero Pedrayo (146) e o IES Ferro Couselo (104).
Co acto de hoxe, o Concello destacou o valor educativo, deportivo e social dunha das probas máis emblemáticas da cidade, que cada ano mobiliza milleiros de persoas e continúa sendo un referente na promoción da actividade física entre a mocidade ourensá.