Os clubs de piragüismo da provincia reforzan a seguridade dos seus deportistas con novos chalecos salvavidas
A Deputación de Ourense entregou novos chalecos salvavidas a todos os clubs de piragüismo da provincia de Ourense, uns elementos de seguridade obrigatorios para todos os deportistas menores de 18 anos, tanto en competicións como nos adestramentos.
Á entrega estivo a cargo do vicepresidente segundo e deputado de Deporte, César Fernández, e contou tamén coa presenza de Fredi Bea, presidente da Federación Galega de Piragüismo, acompañado por piragüistas de cada club ourensán.
Os chalecos, adquiridos a unha empresa galega especializada en material deportivo náutico, forman parte da colaboración entre a Deputación de Ourense e a Federación Galega de Piragüismo nesta tempada. Cada chaleco leva o logotipo da Deputación na parte dianteira e o da federación nas costas, ademais de estar personalizado coa cor base da indumentaria de cada club.
Estes elementos serán de uso habitual nos clubs, empregándose en todas as competicións provinciais, autonómicas e nacionais nas que participen os piragüistas ourensáns. “Co cal, levará o nome da nosa provincia e da Deputación por todo o territorio nacional”, sinala César Fernández.
Segundo destacou o deputado, a iniciativa busca reforzar a seguridade e a práctica deportiva no piragüismo. Os chalecos están deseñados de forma anatómica e funcional para adestramentos e competicións, adaptándose á talla e peso de cada deportista, garantindo así unha protección e comodidade óptimas para os usuarios.