Os Reis coñecen en Ourense o impacto dos incendios forestais
Os Reis de España desprazáronse este xoves á provincia de Ourense para coñecer de primeira man as consecuencias dos incendios forestais que arrasaron nos últimos meses diferentes municipios da comarca. Don Felipe e Dona Letizia estiveron acompañados pola vicepresidenta terceira e ministra para a Transición Ecolóxica e o Reto Demográfico, Sara Aagesen.
A primeira parada foi no Centro de Coordinación do Distrito Forestal XIV en Verín, onde foron recibidos polo presidente da Xunta de Galicia, Alfonso Rueda; o presidente do Parlamento galego, Miguel Ángel Santalices; o delegado do Goberno en Galicia, Pedro Blanco; o alcalde de Verín, Gerardo Seoane; a conselleira do Medio Rural, María José Gómez; o presidente da Deputación de Ourense, Luis Menor; e o alcalde de Monterrei, José Luis Suárez.
Na sala de control recibiron explicacións da xefa do Servizo Provincial de Incendios, Sandra Martínez, sobre a situación actual e as medidas de prevención. Posteriormente visitaron a nave de vehículos, onde saudaron aos equipos de extinción e aos rexedores dos concellos afectados do Distrito Forestal XIV.
A comitiva trasladouse despois a Montes, no municipio de Cualedro, para coñecer a realidade dunha explotación gandeira afectada polo lume. Alí, os Reis dialogaron cos propietarios de dúas explotacións e dunha granxa de aves que sufriron danos directos.
A visita completouse no Colexio Público de Medeiros, en Monterrei, onde Don Felipe e Dona Letizia se reuniron cun grupo de veciños que padeceron as consecuencias dos incendios. Tras escoitar os seus testemuños, trasladáronlles unha mensaxe de apoio e solidariedade, así como o agradecemento a todos os equipos que loitaron contra o fogo e protexeron á poboación.
Esta viaxe enmárcase nun percorrido que os monarcas están a realizar polas zonas afectadas polos incendios en España. Na xornada anterior estiveran en Zamora e León, mentres que este venres se desprazarán a diferentes localidades de Estremadura.