Os socialistas chaman á conciliación e ao dialógo para desbloquear o conflicto entre o Concello e os praceiros
O grupo municipal socialista do Concello de Ourense expresar o seu “máximo apoio” aos comerciantes da Praza de Abastos número 1 de Ourense logo do anuncio do alcalde, Gonzalo Pérez Jácome, de desaloxalos do espazo que actualmente ocupan na Alameda de forma inminente. Unha situación que din os socialistas, é “absolutamente inxusta”.
“O noso compromiso é firme: traballar para unha saída razoable, acordada e inmediata que permita desaloxar a Alameda, avanzar no traslado temporal e abrir de novo a Praza de Abastos devolvéndoa á actividade comercial que Ourense necesita”, expresan dende o grupo municipal nun comunicado no que chaman ao diálogo entre as partes.
“Toda a cidade é consciente de que existe vontade das partes para avanzar: hai coincidencia política, hai coincidencia social e hai disposición de fondos por parte da Xunta, da Deputación e dos propios praceiros”, din os socialistas, que “é imprescindible pechar e formalizar o compromiso económico e administrativo entre todas as institucións implicadas para garantir a viabilidade do proxecto e a súa continuidade no tempo”.
Para o PSOE, “é evidente que Ourense non pode permanecer máis tempo bloqueado”, e lembran que “a cidade leva anos á espera de recuperar un dos seus espazos máis emblemáticos, e resulta fundamental evitar decisións ou movementos que poidan atrasar ou comprometer un proceso no que tantas persoas teñen depositadas as súas esperanzas e o seu traballo”.
Ante esta situación, dende o PSOE aseguran que o seu único obxectivo neste conflicto é “que Ourense avance, protexendo o emprego de máis de 200 familias e asegurando a recuperación inmediata dun espazo comercial e social fundamental”. A cidade, din, “necesita estabilidade, cooperación institucional e responsabilidade, e non máis incertezas nin confrontacións”. Por iso, tenden a súa man “ao diálogo e á colaboración co resto das forzas políticas e co conxunto das administración. PP, PSdeG, BNG e DO temos a capacidade —e o deber— de contribuír a unha solución seria, pactada e viable”. O prioritario, afirman, “é garantir os acordos necesarios para que a Praza de Abastos poida reabrir e a Alameda recupere o seu uso público con todas as garantías”.