Os socialistas de Ourense organizan unha conferencia co expresidente do Senado, Manuel Cruz
O PSdeG-PSOE de Ourense celebrará este xoves 9 de outubro, ás 20:00 horas, un acto público no Teatro Principal, no que participará o filósofo e expresidente do Senado, Manuel Cruz. A cita forma parte dunha serie de conferencias que se desenvolverán nas próximas semanas en distintos puntos da provincia, contando coa presenza de diversos representantes do partido a nivel estatal.
A conferencia, titulada ‘O eclipse das ilusións no mundo actual’, ten como obxectivo ofrecer ao público reflexións sobre a situación social e cultural contemporánea, da man dunha persoa cunha traxectoria destacada. Manuel Cruz é catedrático de filosofía contemporánea na Universidade de Barcelona, autor de máis de 40 libros e galardoado con premios como o Anagrama 2005. Ademais, colabora con medios como El País, La Vanguardia, El Confidencial, Cadena Ser ou Catalunya Ràdio. A súa implicación social levouno a afiliarse ao PSC, ser elixido deputado no Congreso e, posteriormente, senador, chegando a presidir esta cámara durante a XIII lexislatura.
Durante a súa intervención, Cruz analizará como “é cada vez máis frecuente que as grandes visións do mundo que dominaron a modernidade queden completamente desacreditadas co argumento de que todos os intentos de materializar os seus ideais terminan en fracasos inequívocos”. Tamén abordará aspectos históricos do século XX, facendo especial fincapé na esquerda da Ilustración, na caída do Muro de Berlín e nos fracasos políticos recentes.
Desde o PSdeG-PSOE de Ourense invitan á cidadanía a asistir a estas xornadas, que buscan “servir para reflexionar e buscar inspiración para comprender, e se é necesario, cambiar a realidade que latea ao noso arredor, máis aló dos filtros ideolóxicos e da inacción do silencio”.