Os socialistas esixen ao alcalde que elabore un plan para mitigar os efectos das altas temperaturas
Que o cambio climático xa está aquí e que ten consecuencias devastadoras para o medio ambiente e a saúde das persoas é un feito que cada vez constatan máis estudos científicos. E algúns destes últimos informes revelan que España lidera o incremento de mortes por calor: 39,9 máis por cada 100.000 habitantes dende o 2003 ata o 2022. Neste contexto, e ante as xa habituais elevadas temperaturas que a cidade padece cada verán, dende o grupo municipal socialista esixen que o goberno local se poña a traballar urxentemente nun plan para evitar os seus estragos.
“Ourense é a tixola do país e en verán soportamos temperaturas de máis de 40 graos. Cal é o plan do executivo de Jácome para mitigar os efectos da calor?”, cuestiona a edil do PSdeG María Fernández Ojea ante a ausencia de solucións. “Non sabemos tampouco nada das árbores que se ían plantar nin de ningún tipo de medida para poder facer fronte a esta situación”, engade ao respecto.
Malia a que as elevadas temperaturas non son unha excepción na cidade, o certo é que o alcalde non elaborou nin presentou un plan para combatelas nos últimos cinco anos. Mais tampouco se puxeron en marcha ningunha das opcións que dende o PSOE se propuxeron, como que se dea atención específica –por parte de Protección Civil e Servizos Sociais– para aquelas persoas sen teito que viven nas rúas, nos parques ou zonas de afluencia, proporcionando auga, outros refrixerios ou froitas para evitar deshidratacións na poboación de maior e idade.
“A semana pasada o Ministerio de Sanidade publicaba un plan de prevención e sobre os efectos que o calor ten na saúde das persoas, así como un informe sobre o acontecido durante o 2023. Porque cada vez son máis os incidentes que se producen polas elevadas temperaturas entre a cativada e a poboación de maior idade”, sinala a concelleira. Un dos eixos sobre os que pivota dito plan é poñer a disposición daqueles cidadáns e cidadás que o desexen un “Servizo de Subscrición de Temperaturas e Niveis de Risco”, a través do cal poderán recibir un correo electrónico ou SMS coa información diaria sobre as temperaturas e o nivel de risco para a saúde daquelas provincias e zonas que lles sexan de interese.
Así as cousas, dende o grupo municipal socialista esixen ao goberno local que trace un plan para este verán atendendo ás características etarias dos ourensáns e ourensás e tendo en conta que a calor excesiva non só supón máis falecementos, senón que as persoas tamén ven agravadas as súas patoloxías por estrés térmico. E prestando especial atención aos e ás que traballan ao aire libre nas horas centrais do día.