Os socialistas esixen máis prazas de educación infantil na cidade de Ourense
Neste último mes, varias actuacións por parte do goberno da Xunta de Galicia na cidade de Ourense, referentes aos ámbitos educativo, social e sanitario, están a xerar gran preocupación entre a veciñanza e son consecuencia da falta de planificación, coordinación e información por parte da administración autonómica: o peche da escola infantil “A Casiña”, no barrio de As Lagoas, e a inminente demolición para a súa reforma integral do CIS Nóvoa Santos, na rúa Xoán XXIII.
Por elo, o grupo municipal socialista defenderá unha iniciativa, no pleno ordinario de abril no Concello de Ourense, para instar ao executivo de Alfonso Rueda a estudar e adoptar as medidas necesarias para garantir que a escola infantil permaneza aberta e para que presente de maneira urxente unha planificación razoable e eficaz, en coordinación con todas as partes afectadas, para reorganizar a prestación sanitaria do CIS Nóvoa Santos de maneira provisional (durante a execución das obras) e definitiva (ao seu remate).
Mais as e os socialistas perseguen non só que se deteña o peche da escola, senón dar resposta a unha necesidade que vén quedando sen solución nos últimos anos. “Tendo en conta que existe un déficit de máis de 150 prazas para Educación Infantil na nosa cidade ao quedaren este número de familias sen unha en exercicios anteriores, solicitamos con esta iniciativa que a Xunta amplíe a oferta en Ourense”, explica a voceira do PSdeG no Concello, Natalia González sobre a moción e lembrando que o goberno autonómico decidiu, a finais do ano 2024, proceder á devolución de 22 millóns de euros de fondos europeos destinados á creación de 3.200 prazas públicas de educación infantil de 0 a 3 anos en Galicia.
No que atinxe ao caos xerado pola ausencia de planificación no traslado dos e das profesionais e dos e das doentes do actual centro de saúde Nóvoa Santos mentres se levan a cabo as obras para construír o CIS (Centro Intregral de Saúde), as e os socialistas esixirán que a Xunta se coordine con todas as partes afectadas para a súa distribución entre diferentes instalacións sanitarias. Mais tamén que o executivo municipal estude con rigor e se comprometa, máis alá de anuncios, a poñer en marcha unha modificación ou reforzo provisional de liñas de transporte urbano para dar cobertura ao incremento substancial de usuarios e usuarias que serán trasladados ao centro de saúde de O Couto.
“Esta decisión afecta nin máis nin menos que a case o 30% dos habitantes de Ourense e non foi consensuada coas partes implicadas, xerando un grave problema derivado no Centro de Saúde de O Couto que duplicaría forzosamente a súa asistencia, pasando de 9.500 persoas a 19.000”, remata lembrando a tamén secretaria xeral do PSOE na cidade.