Os socialistas levan ao Pleno da Deputación unha iniciativa a prol da viabilidade económica das farmacias rurais
O Grupo Provincial Socialista leva ao Pleno da Deputación unha iniciativa para que se incentive e facilite a conclusión de convenios para que os establecementos sociosanitarios ourensáns compren os medicamentos en farmacias do seu propio concello.
“A situación da farmacia rural é critica en moitos casos e, á luz da súa importancia e polo ben da provincia, precisamos artellar medidas que melloren as condicións destas, facéndoas viables e estables economicamente”, destaca Marina Vaz, deputada socialista e concelleira no Riós.
“Ben que a situación da farmacia rural é delicada, tal e como nos corroboran desde o Colexio Oficial de Farmacéuticos de Ourense, nós mesmo temos constatado casos nos que establecementos como residencias de anciáns, que dependen dos preceptivos acordos con instancias públicas e a supervisión das autoridades competentes, realizan as súas compras de medicamentos fóra dos concellos onde desenvolven a súa labor, e mesmo fóra da provincia de Ourense!”, subliña Vaz.
Vaz explica como, “despois de reunirnos cos profesionais do sector, analizar a lexislación vixente e os diferentes ámbitos de competencias das diferentes administracións, concluímos que o máis realista e inmediato é ver de asentar que as compras de medicamentos destes establecementos se fagan dentro do propio concello, garantindo a viabilidade de moitas farmacias do noso rural”.
Un servizo esencial en apuros
Das case que 1.400 farmacias que hai en Galicia, en Ourense hai arredor de 190 unidades, sendo a súa capilaridade fundamental nunha provincia marcada pola dispersión xeográfica e cunha poboación en idade avanzada.
Segundo Vaz, “as farmacia rurais adoitan desenvolver un importantísimo rol social, xa que os farmacéuticos son figuras próximas á comunidade, que coñecen ben as súas entornas e aos seus veciños, ofrecendo non só axuda e consello médicos, senón tamén apoio emocional”. “En zonas con poboacións moi envellecidas e esparexidas este tipo de relacións humanas son chave para a cohesión social e o benestar xeral da veciñanza”, estima Vaz.
“Amais, na súa condición de servizo esencial, as farmacias rurais contribúen a paliar o éxodo cara cidades e vila, axudando a súa mera existencia a reter aos residentes, sobre todo ás persoas maiores e quen dependen de atención e seguimento médico constante, cooperando á sustentabilidade destas pequenas comunidades”, sentenza a deputada socialista na Corporación Provincial.