Os socialistas sacan adiante unha moción para ampliar as prazas de educación infantil en Ourense
A caótica situación na Sanidade pública que actualmente padece a cidade quedou reflectida no pleno ordinario do mes de abril do Concello de Ourense a través das dúas mocións defendidas pola voceira do grupo municipal socialista, Natalia González. Lamentou, neste senso, a ausencia total de planificación da Xunta de Galicia ante problemas que veñen de lonxe e que afectan tanto ás instalacións que dependen da Consellería de Sanidade como aos e ás profesionais e pacientes.
Por unha banda, as socialistas conseguiron o apoio do pleno –cos votos a favor de DO e BNG– para a iniciativa que insta á Xunta de Galicia a estudar e adoptar as medidas necesarias para garantir que se aumente o número de prazas públicas de 0 a 3 anos na cidade –e se dea unha opción de conciliación óptima para as familias que dispoñían da escola infantil A Casiña para as súas crianzas– e insta, do mesmo xeito ao goberno autonómico, a presentar de maneira urxente unha planificación razoable e eficaz, en coordinación con todas as partes afectadas, para reorganizar a prestación sanitaria do CIS Nóvoa Santos de maneira provisional (durante a execución das obras) e definitiva (ao seu remate).
Ante a crítica do rexedor, Gonzalo Pérez Jácome, que cualificou á moción que aúna ámbolos dous temas de “frikada”; a voceira do PSdeG, Natalia González Benéitez contestou que “o que realmente é unha ‘frikada’ é que o alcalde, no debate de dous temas cruciais para a cidadanía se ausente” do pleno. Tamén recriminou ao PP que apoiase a opinión de quen ostenta o bastón de mando no Concello de Ourense. “Hai que ter papo para dicir que como nós incluímos dous asuntos nunha iniciativa non os consideramos importantes. Oxalá tiveramos opción a presentar máis mocións para traballar pola veciñanza no canto de facer como o Partido Popular que pode presentar 2 por sesión plenaria, trae só unha e resulta que é un copia e pega que presenta por terceira vez”, respondeu ao grupo da oposición.
Nesta liña, a portavoz lembrou que das 24 escolas infantís, das cales só 7 son de titularidade pública, resultan totalmente insuficientes para a demanda da cidade de Ourense e urxe aumentar as prazas de 0 a 3 anos para garantir a conciliación das familias, non só do barrio de As Lagoas.
No que atinxe ao caos xerado pola ausencia de planificación no traslado dos e das profesionais e dos e das doentes do actual centro de saúde Nóvoa Santos mentres se levan a cabo as obras para construír o CIS (Centro Intregral de Saúde), as e os socialistas esixiron que a Xunta se coordine con todas as partes afectadas para a súa distribución entre diferentes instalacións sanitarias. “As decisións que tomen ao respecto afectarán, nin máis nin menos que, a case o 30% dos habitantes de Ourense e non foron consensuadas dende o principio coas partes implicadas”, afirmou a socialista.
Así mesmo, na defensa dos servizos públicos para Ourense, a voceira do PSdeG incidiu en que executivo galego de Alfonso Rueda debería deixar de “xogar ao tetris” e que o modelo do PP persegue beneficiar á sanidade privada ao non ser quen de reducir as listas de agarda para servizos tan fundamentais como os médicos de cabeceira, Psiquiatría e Psicoloxía ou mesmo Pediatría. Por este motivo, as e os socialistas presentaron outra iniciativa no pleno de abril para facer un chamamento á participación na manifestación que o domingo terá lugar en Santiago de Compostela pola Sanidade pública e que foi rexeitada cos votos en conta de PP e DO.
“Xa temos comprobado que canto peor lle vai ao público, mellor para o privado. Porque non defenden a sanidade gratuíta e universal e hai que ser claros neste punto. A nosa cidade e provincia son o proxecto piloto do desmantelamento da Sanidade pública e aí están os datos”, insistiu Natalia González. “A imaxe de parte do teito do hospital Materno Infantil co teito caído, por desgraza, é a imaxe do servizo na nosa cidade”, lamentou ante un feito que xa aconteceu con anterioridade –en decembro de 2023– e ante o que a Xunta de Galicia non actuou ata o de agora que planifica mover as diferentes áreas a outras partes do CHUO.
Para o grupo municipal socialista, a situación xeral da sanidade pública con listas de espera inasumibles, demoras en atención primaria, falta de investimento en servizos clave como saúde mental e recortes en recursos tanto materiais como humanos, está nun momento “límite e precisa de accións políticas decididas orientadas a mellorar e fortalecer o sistema sanitario, mirando especialmente para Ourense”.