Ourencanto celebrará a súa oitava edición do 14 ao 16 de abril de 2026
Ourense acollerá do 14 ao 16 de abril de 2026 unha nova edición de Ourencanto, un encontro coral que se desenvolverá entre o Conservatorio Profesional de Música e o Auditorio Municipal de Ourense. O certame reunirá coros xuvenís, de educación primaria, secundaria e de canto común.
Nesta oitava edición hai xa 445 participantes inscritos, procedentes de distintos centros e agrupacións, que traballarán conxuntamente ao longo das xornadas en distintas actividades musicais e formativas.
Ourencanto rematará cun concerto aberto ao público, no que os coros participantes amosarán o traballo realizado durante o encontro.
A programación foi presentada este xoves nunha reunión da organización co delegado territorial da Xunta de Galicia en Ourense, Manuel Pardo Cid, e co director territorial da Consellería de Educación, Ciencia, Universidades e Formación Profesional en Ourense, Jorge Rubén Sampedro Grande.
Desde a organización de Ourencanto agradecen a colaboración e o apoio da Xunta de Galicia para seguir consolidando este proxecto musical, cultural e educativo que xa se converteu nunha referencia.