Ourense acolleu un encontro internacional para abordar os riscos meteorolóxicos do cambio climático
A Facultade de Dereito do campus de Ourense foi o escenario este xoves do Encontro Internacional Dereito e Riscos Meteorolóxicos Extremos Xerados polo Cambio Climático, unha iniciativa organizada pola Universidade de Vigo a través da Agrupación de Grupos de Investigación de Dereito Administrativo e Filosofía do Dereito (AGAF), co apoio do Campus Auga.
A xornada, dirixida polos catedráticos Pablo Raúl Bonorino e Raquel Olalla Nieto, abordou como o dereito pode contribuír á resiliencia e adaptación fronte a eventos extremos, como incendios, ondas de calor ou inundacións, que aumentan pola crise climática. Na apertura, Bonorino destacou a importancia de que xuristas e científicos reflexionen sobre estas cuestións e sobre as respostas posibles desde as políticas públicas e o marco legal.
O encontro está vinculado ao proxecto estatal Exmerisk, coordinado polo CSIC, que analiza os riscos de eventos meteorolóxicos e hidrolóxicos extremos en España e busca ferramentas para mellorar a resiliencia ante o cambio climático. Dentro deste proxecto, o subproxecto Climatelaw, dirixido por María Concepción Gimeno (Universidade de León), centrouse na utilización do dereito como instrumento para facer fronte aos impactos destes fenómenos.
A primeira parte do encontro, dirixida a alumnado de Dereito, tratou sobre a eficacia do dereito fronte aos efectos do quecemento climático, incluíndo análise de dereitos humanos, respostas políticas, litigios climáticos e limitacións normativas. Interviron expertos internacionais como Dario Ippolito (Italia), Pablo Slavin (Arxentina) e Sergio Vicente Serrano (CSIC). Na segunda xornada, organizada pola Facultade de Ciencias e o grupo EPhysLab, abordáronse os impactos dos extremos climáticos en sistemas agroforestais. Entre as intervencións, destacaron Ana Maria Durán sobre xustiza climática, Ana Russo sobre risco agrícola na Península Ibérica, Celia Gouveia sobre secas, ondas de calor e incendios, e Fernando Domínguez sobre a evolución dos extremos climáticos desde o século XVI até a era da intelixencia artificial.