Actualidade

A iniciativa reunirá durante toda a semana a profesionais da saúde, familias, educadores e asociacións para abordar os retos de saúde e benestar na infancia e na adolescencia

Inauguración da I Semana da Infancia de Ourense

O Colexio Oficial de Enfermaría de Ourense acolleu este luns a xornada inaugural da I Semana da Infancia, unha iniciativa que reúne durante cinco días a profesionais da saúde, familias, educadores e asociacións para reflexionar e propoñer solucións sobre os retos de saúde e benestar que afronta a infancia e a adolescencia.

A mesa inaugural, presidida por María José Menor, presidenta do Colexio de Enfermaría de Ourense, abriu oficialmente o evento destacando o papel da enfermaría na promoción do benestar infantil. No seu discurso, Menor sinalou: "esta actividade será unha oportunidade única para fortalecer a colaboración entre profesionais, asociacións e familias, e mellorar a saúde e o benestar dos nosos nenos e adolescentes".

Desde a organización, tanto o COE Ourense como Satse Galicia quixeron destacar a relevancia da I Semana da Infancia como espazo de encontro: "A Semana da Infancia non só é un foro para a análise, senón unha plataforma para impulsar cambios reais. A nosa misión como enfermeiros é acompañar e garantir o benestar dos nenos e adolescentes en todos os ámbitos do seu desenvolvemento".

Xunto a Menor participaron Jacobo Sastre Rey, Director Xeral de Familia, Infancia e Dinamización Demográfica; Laura López del Castillo, Xefa Territorial da Consellería de Sanidade; e Manuel Fariñas, Secretario de Acción Sindical de SATSE Galicia, que destacaron a importancia dun enfoque interdisciplinar no coidado dos máis novos.

A primeira charla da semana correu a cargo de Elisa López Calvo e outras representantes de Anedia, que presentaron unha análise sobre os hábitos saudables na infancia e o impacto do apoio emocional ás familias na xestión da diabetes infantil.

Unha semana de diálogo e acción

Durante os próximos días, as instalacións do Colexio de Enfermaría acollerán expertos e asociacións para abordar temas esenciais desde diferentes perspectivas. Falarase de diabetes infantil, trastornos do espectro autista, enfermidades raras, saúde mental, trastornos da alimentación e como, desde o coñecemento e a implicación, podemos dar resposta ás demandas de saúde e benestar infantil.

• Martes, 19 de novembro: Down Ourense e ANPE Galicia tratarán a humanización hospitalaria e a educación e saúde, respectivamente.
• Mércores, 20 de novembro: FEGEREC profundará na detección e abordaxe de enfermidades raras no ámbito educativo e dará voz a historias de caso.
• Xoves, 21 de novembro: A Federación Autismo Galicia e a Asociación Trascos analizarán as barreiras na atención a persoas con TEA e as experiencias das familias nos entornos sanitarios. O Colexio Profesional de Logopedas de Galicia centrarase nas dificultades de alimentación na infancia desde a logopedia e a terapia ocupacional.
• Venres, 22 de novembro: ASEIA Galicia e AMECE pecharán a semana con intervencións sobre saúde mental infantil e o papel da enfermaría escolar en Galicia e España, respectivamente.

Expertos ao servizo do benestar infantil

Entre os expertos que se darán cita durante a próxima semana en Ourense atópanse Carmen López Rodríguez, directora de FEGEREC; Natividad López Langa, presidenta de AMECE; e representantes de ANPE Galicia, que achegarán a súa experiencia e coñecemento nas xornadas de debate e reflexión. As sesións, abertas ao público, terán ata o venres, 22 de novembro, no Colexio de Enfermaría de Ourense, de 16.00 a 19.30 horas.