Ourense converterase no epicentro do baloncesto estatal co torneo As Burgas Basket Cup

Equipos da ACB e da LF Endesa citaranse en setembro na cidade para render homenaxe á historia do baloncesto en Ourense e á figura de Gonzalo Bernardo

Ourense será sede do Torneo As Burgas Basket Cup, un evento deportivo de alto nivel organizado polo Club Ourense Baloncesto que se celebrará no Pazo dos Deportes Paco Paz durante setembro. O torneo reunirá equipos destacados das ligas ACB e LF Endesa, tanto na categoría masculina como feminina.
O torneo quere render homenaxe á historia do baloncesto en Ourense e á figura de Gonzalo Bernardo, un dos fundadores do Club Bosco en 1978, que tivo un papel fundamental no crecemento do deporte na cidade.
O torneo feminino disputarase do 5 ao 7 de setembro con encontros entre Perfumerías Avenida, Ensino Lugo e Araski AES. En canto ao masculino, os partidos serán os días 12 e 13 de setembro, cun cartel con equipos da ACB como Dreamland Gran Canaria, Río Breogán, Club Ourense Baloncesto e Surne Bilbao Basket.
Ademais, durante os días do torneo masculino celebrarase un clínic dirixido por Moncho López, adestrador do COB, orientado a adestradores, estudantes e afeccionados que queiran ampliar os seus coñecementos sobre o baloncesto.