Ourense dálle a benvida ao 2026 co tradicional concerto de Aninovo a cargo de Rubén Simeó
Como cada 1 de xaneiro, o Auditorio Municipal de Ourense acollerá o tradicional Concerto de Aninovo, que este ano estará a cargo do recoñecido trompetista vigués Rubén Simeó, que repite como artista elixido para darlle a benvida ao ano na cidade das Burgas.
Rubén Simeó conta cunha ampla e destacada traxectoria musical. Con só 8 anos empezou a obter premios en prestixiosos concursos internacionais, como o Yamaha Madrid, Cidade de Benidorm (presidido por Maurice André), Porcia en Italia e o Concurso Maurice André en Francia, onde foi o concursante máis novo en todas as edicións.
Aos 12 anos actuou como solista no Concerto de Nadal da Orquestra da RTVE baixo a dirección de Adrian Leaper. Desde entón, participou en numerosos programas de radio e televisión en España e no estranxeiro, incluíndo Radio France, a televisión italiana, Tokyo TV e Beijing TV.
Rubén Simeó colaborou con importantes orquestras nacionais e internacionais e estreou obras de compositores que lle dedicaron pezas, como o trompetista Arturo Sandoval, quen lle dedicou o seu concerto para trompeta e orquestra, interpretado por Rubén en varias xiras por distintos países. Ademais da súa carreira como solista, forma parte do dúo “Simant” xunto co pianista Antonio Morant, co que desde 2018 levou o dúo trompeta-piano a un nivel destacado, interpretando composicións clásicas, pop e música cinematográfica.