Ourense rende homenaxe a Eduardo Blanco Amor
A Deputación de Ourense participou esta mañá na tradicional homenaxe ao escritor Eduardo Blanco Amor, celebrada cada decembro coincidindo coa data do seu pasamento. O acto tivo lugar no cemiterio de San Francisco, onde repousan os restos do autor ourensán.
O deputado provincial José María Lago destacou o “legado cultural” deixado polo intelectual no 46º aniversario da súa morte, así como o “labor de preservación” que realiza a Fundación Eduardo Blanco Amor. O seu presidente, Luis González Tosar, participou tamén na ofrenda organizada pola entidade.
Como cada ano, alumnado do IES Eduardo Blanco Amor de Ourense participou na homenaxe lendo varios poemas fronte á tumba do escritor. A xornada concluíu coa tradicional ofrenda floral que compartiron representantes institucionais, a fundación e asistentes ao acto.