Ourense será a sede do I Congreso Internacional de Xestión da Balneoterapia
Este mércores presentouse no campus de Ourense o I Congreso Internacional de Xestión da Balneoterapia, que terá lugar os días 20 e 21 de novembro de 2025. Esta cita enmárcase dentro do Campus Auga, un proxecto de especialización do campus de Ourense acreditado e financiado pola Consellería de Educación, Ciencia, Universidades e Formación Profesional da Xunta de Galicia.
A presentación realizouse tras a reunión do comité organizador no edificio Xurídico-Empresarial, onde Francisco Javier Rodríguez, vicerreitor do campus, destacou que este congreso está alineado cunha das liñas estratéxicas do Campus Auga: a xestión da auga termal. Sinalou que o evento permitirá potenciar o proxecto e a súa proxección internacional. Pola súa banda, Belén Gómez, xefa da área de Turismo Termal da Xunta de Galicia en Ourense, resaltou a importancia do congreso tendo en conta que Galicia conta con 21 balnearios e catro talasos, así como as múltiples vantaxes médicas que ofrecen as augas mineromedicinais.
Representantes do comité organizador, como Mª Montserrat Cruz (Universidade de Vigo), Juan Cerdeira (Deputación de Ourense), Javier Soto (Grupo Caldaria) e Juan Gestal (Universidade de Santiago de Compostela), subliñaron a relevancia de poñer en valor os recursos termais, as propiedades terapéuticas das augas mineromedicinais e avanzar cara ao seu aproveitamento por parte do sistema nacional de saúde, tal como ocorre noutros países europeos.
O congreso, titulado 'Aproveitamento médico dos balnearios polo Sistema Nacional de Saúde: unha oportunidade para o desenvolvemento termal', ten como obxectivo ser un espazo para reflexionar e intercambiar coñecementos sobre o mellor uso das propiedades terapéuticas das augas mineromedicinais. A primeira edición aposta por un enfoque multidisciplinar que abordará aspectos relacionados coa xestión médica dos balnearios, o turismo sanitario, a responsabilidade social e os obxectivos de desenvolvemento sostible vinculados ao recurso hídrico terapéutico.
Durante o evento analizaranse liñas de investigación e transferencia sobre a balneoterapia, coa participación de especialistas que expoñerán resultados e modelos de traballo relacionados con indicacións médicas actuais, tendencias do mercado de balnearios en sistemas de saúde europeos, a xestión destes centros e o turismo de saúde.
Desde a organización destacan que a auga termal posúe características únicas, como a súa temperatura naturalmente elevada, que a converten nun recurso esencial para tratamentos beneficiosos para a saúde. A balneoterapia é adecuada para tratar enfermidades reumatolóxicas, dermatolóxicas e respiratorias, así como para a prevención, o envellecemento saudable, a rehabilitación e tamén para a relaxación e o equilibrio físico e mental. Ademais, esta xestión termal representa un activo estratéxico para desenvolver experiencias personalizadas de benestar que combinen terapias tradicionais e modernas, fomentando o turismo de saúde e mellorando os tratamentos médicos. Os organizadores resaltan que Galicia conta cunha gran riqueza balnearia que podería aproveitarse para mellorar a saúde da poboación e consolidarse como un piar fundamental do turismo sostible e de saúde.