Ourense será sede do Campionato Mundial de Atletismo Short Track Virtus 2026
A cidade de Ourense acollerá do 4 ao 9 de marzo o Campionato do Mundo de Atletismo Short Track Virtus 2026, unha cita que reunirá na pista cuberta de Expourense á elite internacional do atletismo para deportistas con discapacidade intelectual. As xornadas de competición desenvolveranse entre os días 6 e 8 de marzo.
O evento está organizado por Virtus, federación internacional do deporte para persoas con discapacidade intelectual, xunto coa Federación Española de Deportes para Persoas con Discapacidade Intelectual (FEDDI). Participarán 113 atletas e 51 técnicos de once países, entre os que se atopan España, Bulgaria, Francia, Italia, Polonia, Portugal, República Checa, Suecia, Turquía, Ucraína e un equipo neutral que competirá baixo a denominación establecida por Virtus.
Con esta cita, España volve situarse como referente na organización de grandes campionatos internacionais Virtus, apenas tres meses despois do Mundial de Futsal celebrado en Torrevieja. A FEDDI encadea así dous campionatos do mundo nun curto espazo de tempo, reforzando a súa aposta polo deporte de alto nivel para persoas con discapacidade intelectual.
A competición chega tras o destacado papel do equipo español no Europeo disputado en marzo de 2025 en Espoo (Finlandia), onde acadou 13 medallas e o cuarto posto no medalleiro. O obxectivo agora é loitar polo podio por equipos na casa, arroupados pola afección.
Baixo o lema “On your marks… Ourense!”, o campionato desenvolverase nunha pista cuberta de 200 metros, en probas nas que a velocidade, a técnica e a estratexia se deciden en segundos. Máis alá do espectáculo deportivo, a organización busca implicar á comunidade local, centros educativos, clubs e voluntariado, xerando un impacto que transcenda o estritamente competitivo.
“Competir en casa transforma un campionato. Non só polo apoio do público, senón porque converte cada actuación en algo aínda máis especial. Para os nosos atletas supón un impulso competitivo e emocional enorme, e para España é unha oportunidade para demostrar que o deporte para persoas con discapacidade intelectual forma parte do presente e do futuro do alto rendemento”, subliñou a directora executiva da FEDDI, Celia Garrote de las Heras, durante a presentación.
O campionato, sinalan desde a organización, aspira a deixar un legado duradeiro na promoción do deporte inclusivo, nun momento de crecemento sostido en España, onde a FEDDI supera as 12.000 licenzas deportivas. Durante seis días, Ourense converterase en punto de encontro de atletas, adestradores, familias e afeccionados co obxectivo de demostrar que o deporte de alto nivel non entende de etiquetas.
A celebración do evento conta co respaldo institucional da Xunta de Galicia (Deporte Galego), da Deputación de Ourense e do Concello de Ourense, así como coa colaboración de distintas entidades deportivas e empresas patrocinadoras.