Padrenda avanza na mellora dos servizos destinados ás persoas dependentes
O Concello de Padrenda, o Centro Interparroquial e Social do Alto Mouro (CISAM) e Afaga Alzheimer levaron a cabo este venres unha reunión e unha sesión formativa en Parada do Monte, Melgaço, co obxectivo de identificar necesidades en materia de dependencia e explorar posibles colaboracións para mellorar os servizos destinados ás persoas maiores no ámbito rural transfronteirizo.
Durante a mañá, representantes destas entidades, encabezados polo alcalde de Padrenda, Manuel Pérez Pereira, analizaron a situación actual dos servizos sociais en Padrenda, enfocándose nas carencias e oportunidades para ampliar a atención á dependencia. Este encontro enmárcase nun esforzo conxunto para fortalecer a cooperación entre territorios españois e portugueses.
Xa pola tarde, profesionais de Afaga Alzheimer impartiron unha formación especializada na sede do CISAM para mellorar a capacitación dos equipos que traballan con persoas afectadas por demencias. A sesión abordou aspectos relacionados cos síntomas cognitivos, conductuais e psicolóxicos, proporcionando ferramentas para unha mellor xestión destes casos.
Estas iniciativas forman parte do proxecto LongSocial, cofinanciado pola Unión Europea a través do programa Interreg VI-A España-Portugal (POCTEP) 2021-2027, que busca optimizar a oferta de servizos sociais para maiores en zonas rurais, promovendo a colaboración entre entidades de ambos os lados da fronteira.
O partenariado do proxecto está conformado polo CISAM, Afaga Alzheimer, a Santa Casa da Misericordia de Melgaço e a Sociedade Galega de Xerontoloxía e Xeriatría (SGXX).