Patricia Torres defende o labor da Deputación de Ourense durante a emerxencia dos incendios
A portavoz do grupo provincial do Partido Popular, Patricia Torres, destacou no Pleno extraordinario e urxente celebrado hoxe na Deputación de Ourense o traballo desenvolvido pola institución provincial durante a situación de emerxencia xerada polos incendios forestais. Torres asegurou que a resposta foi exemplar, mentres que o Goberno central “non estivo á altura” e a oposición autonómica “preferiu a foto e a pancarta antes que apoiar á xente e ás institucións”.
A dirixente popular incidiu en que “os lumes só se apagan con medios, coordinación e compromiso real co territorio”, polo que convidou ao resto de forzas políticas a facer propostas e analizar cambios en materia forestal. Apelou tamén á responsabilidade individual e colectiva e á necesidade dunha silvicultura máis sustentable, apostando pola plantación de especies autóctonas.
Torres acusou á oposición de actuar con fins propagandísticos e reprochou ao BNG ter votado en contra no Parlamento da Lei de recuperación da terra. Considerou que o debate sobre os incendios está a ser utilizado como “unha estratexia política” que non resolve o problema real nin axuda á cidadanía.
A portavoz popular recoñeceu que, a pesar de contar co que cualificou como “o mellor dispositivo de Europa”, a virulencia dos lumes —na súa maioría provocados— fixo imposible atender todos os focos ao mesmo tempo. Por iso, avanzou que o PP proporá cambios nas políticas forestais e de prevención, pero sempre “con serenidade, sentándonos cos técnicos, cos alcaldes, cos gandeiros, cos axentes e cos equipos de extinción para aprender do sucedido”.
En relación cos concellos, Torres sinalou a falta de medios técnicos e económicos para poder acometer a limpeza de montes e chamou á responsabilidade dos propietarios, así como a aplicar ferramentas que permitan notificar e sancionar cando sexa preciso. Defendeu tamén que os montes veciñais deben reinvestir os seus beneficios no propio territorio.
A popular criticou con dureza á Fiscalía pola decisión de investigar aos concellos para comprobar se tiñan os plans de prevención actualizados. “É inxusto pretender sinalar aos alcaldes con responsabilidades penais. Os concellos damos a cara cando hai lume, non podemos ser tratados como culpables dunha situación que nos supera”, afirmou.
Finalmente, Torres expresou o seu agradecemento a todos os que participaron nas tarefas de extinción e apoio: bombeiros, brigadistas, servizos de emerxencia, pilotos, UME, BRILAT, Garda Civil, Policía Autonómica, 061, GES, brigadas municipais, Cruz Vermella, alcaldes, voceiros municipais, veciños, gandeiros, empresas privadas e voluntarios. “Fixestes posible o que parecía imposible. Grazas de corazón, porque demostrastes que Ourense é unha terra solidaria e valente”, concluíu.