Pereiro de Aguiar foi o escenario este venres da segunda etapa da marcha cicloturista de Special Olympics Galicia
A décimo terceira edición da marcha cicloturista de Special Olympics Galicia, un evento no que os protagonistas son as persoas con discapacidade intelectual, percorreu este venres Pereiro de Aguiar cun gran éxito de participación.
Trátase dun evento inclusivo que recorre Galicia e que conta coa participación de máis de 200 persoas, entre deportistas con e sen discapacidade intelectual, voluntariado e persoal técnico. O obxectivo principal da actividade é visibilizar ao colectivo da discapacidade a través do deporte e promover a súa plena inclusión na sociedade.
O programa arrancou o pasado 2 de outubro no pavillón municipal de Barreiros e continuará o 4 de outubro na Praza do Obradoiro, en Santiago de Compostela. A marcha pecharase o 5 de outubro na Praza da II República, en Vilagarcía de Arousa.
A iniciativa ten como finalidade promover o deporte inclusivo e destacar o talento e o esforzo das persoas con discapacidade intelectual, poñendo en valor a súa capacidade e participación activa na sociedade.