Pereiro de Aguiar ofrecerá un servizo de conciliación para os festivos de outubro e novembro

A Aula Concilia estará dispoñible os días 31 de outubro e 3 de novembro, e as solicitudes poderán presentarse ata o próximo 22 de outubro

O Concello do Pereiro de Aguiar anunciou a apertura do prazo para presentar solicitudes ao servizo “Aula Concilia”, destinado a facilitar a conciliación familiar durante os días non lectivos do 31 de outubro e do 3 de novembro.

O período de presentación de solicitudes prolongarase ata o 22 de outubro, podendo entregarse no Rexistro das Oficinas Municipais ou a través da Sede Electrónica do Concello. As listas de admitidos faranse públicas o 24 de outubro no blog da Aula (Piratas da Aula da Baixo) e na páxina web do Concello.

Esta iniciativa ten como obxectivo ofrecer un recurso de apoio ás familias durante as xornadas sen actividade escolar, garantindo un espazo seguro de aprendizaxe e entretemento para os nenos e nenas do municipio.