Programa das Festas de Ourense para este venres, 20 de xuño
As Festas de Ourense 2025 continúan hoxe, venres 20 de xuño, cunha ampla programación que inclúe unha das actuacións máis esperadas: Nil Moliner actuará ás 23.00 horas nos exteriores do Pavillón dos Remedios. Posteriormente, desde as 0.45 ata as 3.00 da madrugada, haberá unha sesión de DJ no mesmo espazo.
A programación de actividades do día inclúe tamén o mercado medieval nos exteriores do Pavillón dos Remedios, aberto de 11.00 a 00.00 horas (agás o domingo, que pechará ás 23.00), con actividades e pasarrúas de 11.00 a 23.00 horas. No Parque de San Lázaro, de 11.00 a 14.00 e de 18.00 a 21.30 horas, continúa a Feira do Libro de Ourense, que inclúe actividades relacionadas coa reciclaxe, como teatro, obradoiros, contacontos, maxia, recital poético, xogos e máis, nunha acción conxunta de Feiras do Libro de Galicia, Ecourense e o Concello.
Tamén hoxe, de 18.00 a 21.00 horas, celebrarase unha xincana de inchables no Parque xunto á Ponte Romana (na beira pontina). As atraccións festivas estarán operativas no Parque Barbaña entre as 19.00 e as 2.00 horas. Ás 20.00 horas comezará no anexo do Pavillón o Torneo de Futbolín Máster de Ourense, en modalidade tenteo.
Por mor das actividades, están previstos cortes de tráfico en varias rúas da cidade: a rúa Pardo de Cela estará pechada ao tráfico no treito comprendido entre a Praza de Concepción Arenal e a glorieta do Mundo, xunto ao Pavillón dos Remedios, ata o luns 23 de xuño, debido ás orquestras e concertos. Polas atraccións festivas, pecharanse ao tráfico o Paseo Ponte Pedriña e a rúa Porto Carreiro, desde a Travesía Porto Carreiro B até a rotonda da rúa Fonte do Bispo, desde as 19.00 horas.