Rematan as obras de humanización da praza de Fonteboa, en San Cibrao das Viñas
Este martes remataron as obras de humanización dunha praza en Fonteboa, no Concello de San Cibrao das Viñas, grazas a un acordo de cooperación subscrito entre a Consellería de Vivenda e Planificación de Infraestruturas e o ente municipal, que contou cun investimento de máis de 133.000 euros, dos que o 70% foi unha achega do Goberno galego.
O obxectivo desta actuación foi humanizar a praza xerada na confluencia das rúas Fonteboa e Camiño da auga, coa remodelación total do ámbito, incluíndo a dotación de novo arborado, mobiliario urbano e luminarias.
Os traballos consistiron na pavimentación da praza, nalgunhas zonas con lastras de granito e noutras con formigón e na construción dunha beirarrúa de 2m de ancho. Ademais, entre as actuacións máis destacadas está a demolición do muro e lavadoiro existente para a súa posterior reconstrución, así como as actuacións de drenaxe completa no recinto. A reforma completouse oa colocación de dúas novas luminarias e dun cartel coa lenda “Fonteboa”, así como na habilitación de catro alcorques con colocación de árbores, catro xardineiras con arbustos; e a instalación de seis bancos e papeleiras.
A intervención desenvolveuse ao abeiro do chamado plan Hurbe, un programa impulsado polo Goberno galego en 2010 co fin de axudar ás administracións locais a financiar este tipo de iniciativas que inciden de forma positiva na calidade de vida da veciñanza.