Renfe pon en marcha novas medidas antifraude nos bonos Avant
A partir do 1 de marzo, Renfe aplicará novas medidas no uso dos títulos bonificados para os trens Avant. Os novos procedementos impleméntanse para seguir fomentando o bo uso dos abonos Avant e Media Distancia convencional.
Desde mañá, nos servizos Avant de Renfe, que en Galicia enlazan Ourense coa Gudiña, Sanabria e Zamora, non se poderán formalizar viaxes para dous ou máis trens consecutivos no mesmo sentido. Esta medida aplicarase cando entre dúas formalizacións o horario de saída de orixe da primeira e o da segunda sexa inferior ao triplo do tempo de viaxe.
Os usuarios que non vaian utilizar a praza reservada cos abonos Avant deberán cancelala cun mínimo de 60 minutos de antelación. Se polo menos en tres ocasiones non leva a cabo a cancelación como marca a normativa, perderán o dereito para adquirir novos abonos con desconto durante os seguintes 90 días.
Tras detectarse dúas cancelacións non realizadas coa antelación mínima requirida, Renfe comunicará as posibles consecuencias ao viaxeiro a través do contacto facilitado polo mesmo.
Media Distancia convencional
Nos percorridos de Media Distancia por vía convencional, en xaneiro Renfe ampliou a unha hora o tempo no que unha reserva formalizada en caso de non realizar a viaxe debe anularse.
Os usuarios que utilicen a praza reservada cos abonos deben cancelala cun mínimo de 60 minutos de antelación. Se en tres ocasiones non cancelaron a praza coa mencionada antelación, perderán o dereito para adquirir novos abonos durante os seguintes 30 días.
Tras detectarse dúas cancelacións non realizadas coa antelación mínima requirida, Renfe comunicará as posibles consecuencias ao viaxeiro a través do contacto facilitado polo mesmo.
No caso dos títulos multiviaje dos servizos de Media Distancia, como xa se está realizando, incautarase a fianza e non se expedirá un novo abono bonificado ata transcorridos 30 días desde a anulación.
Tanto en Avant como en Media Distancia Convencional, estes procedementos teñen como obxecto que o uso dos abonos non supoña un prexuízo para o resto dos cidadáns que desexan realizar os seus desprazamentos.
Controis en accesos e trens
A compañía continúa realizando controis aleatorios a bordo e nos controis de acceso aos trens Avant para evitar os casos puntuais de uso irregular de títulos bonificados.
En ocasións, hai usuarios de abonos Avant e Media Distancia convencional que reservan varias prazas e despois non viaxan e tampouco as anulan. Esta situación dificulta que outros viaxeiros con necesidade de desprazarse neses horarios e traxectos poidan conseguir a súa praza. Ademais, provoca que o tren leve prazas desocupadas que non se poden comprar xa que aparece “tren completo” na venda.
Tamén se detectaron usos fraudulentos co uso de abonos doutros titulares. Renfe lembra que os abonos obxecto de subvención son nominativos (precísase que o DNI coincida co usuario do abono). Para viaxar a bordo dos seus trens é necesario formalizar os billetes con abono e que a identidade do viaxeiro sexa coincidente coa que aparece no seu título de transporte. No caso de demostrarse un uso incorrecto, Renfe sancionará aos viaxeiros, segundo dispón a normativa de ‘Condicións xerais dos contratos de transporte’ de Renfe Viaxeiros.Para facilitar a comunicación cos clientes, Renfe puxo en funcionamento unha liña telefónica específica, 91 919 15 67, para informar destes abonos gratuítos.