Sergio Alba levará a Allariz o seu espectáculo 'Dous rombos… Pasa para a cama'
O humorista Sergio Alba achegará a Allariz o seu espectáculo 'Dous rombos… Pasa para a cama', unha proposta que convida ao público a mirar cara ao pasado cun sorriso e moita retranca. O show terá lugar o domingo 28 de decembro, ás 19:30 horas, na Casa da Cultura de Allariz.
Trátase dun espectáculo no que a nostalxia xoga un papel fundamental, recuperando lembranzas dunha época marcada polos cambios sociais e culturais, desde a televisión en branco e negro ata a chegada da cor, ou aqueles momentos nos que dous rombos na pantalla anunciaban que chegara a hora de ir para a cama. A través do humor, Sergio Alba propón revisar non só os recordos máis entrañables, senón tamén aquelas situacións das que, co paso do tempo, talvez non nos sentimos tan orgullosos.
A proposta anima a desconectar por un intre da rutina dixital actual e a rir do noso lado máis analóxico, nun espectáculo pensado para todos aqueles que queiran recoñecerse nesas vivencias compartidas.
As entradas xa están á venda na Casa da Cultura de Allariz e tamén se poden reservar nos teléfonos 988 440 859 e 607 592 016 ata o 26 de decembro. O aforo é limitado. O espectáculo está organizado polo Concello de Allariz.