Susana Rodríguez Rodríguez e Eva Pérez Gamote toman posesión como deputadas provinciais do PSdeG-PSOE
O Grupo Provincial Socialista renovou este venres parte da súa representación na Deputación de Ourense coa toma de posesión de Susana Rodríguez Rodríguez, concelleira en Coles, e de Eva Pérez Gamote, alcaldesa de Vilardevós, como novas deputadas provinciais. Ambas prometeron o seu cargo ao inicio do pleno ordinario e ocuparon os seus escanos en substitución da concelleira de Amoeiro Susana Rodríguez Estevez e da edil de Riós Marina Vaz Quintillán, respectivamente.
Rodríguez Rodríguez destacou tras o seu nomeamento que "É un orgullo poder representar aos veciños e veciñas da provincia desde esta institución". Pola súa banda, Pérez Gamote agradeceu o traballo da súa predecesora e expresou a súa vontade de manter unha liña reivindicativa en defensa da súa comarca.
No apartado de iniciativas, o pleno aprobou por unanimidade unha moción relativa á posta en marcha dun plan de choque para a reparación de infraestruturas viarias provinciais na comarca de A Limia e á habilitación dunha liña de axuda extraordinaria para os concellos afectados polas inundacións. A proposta, defendida por Susana Rodríguez Rodríguez, solicita que a Deputación refuerce o seu papel de cooperación territorial ante os danos provocados polas borrascas atlánticas deste inverno. Os acordos alcanzados esténdense tamén a outros municipios da provincia que sufrisen danos similares.
Tras a votación, o deputado socialista Álvaro Vila Araújo subliñou que "A unanimidade desta votación é un recoñecemento explícito de que a situación na Limia e noutros concellos da provincia é urxente e real. Agora o goberno provincial ten a obriga de executar o que hoxe aprobou co voto favorable de todos os grupos da cámara". A comarca da Limia arrastra desde hai semanas as consecuencias das choivas persistentes, con estradas afectadas, cultivos anegados e accesos cortados en varios núcleos de poboación. Segundo estimacións do sector primario, as perdas na colleita de cereal de inverno poderían alcanzar ata o 80 %, e municipios como Xinzo activaron os seus plans de actuación ante o risco de inundacións.
Por contra, a moción relativa á xestión sostible de residuos inertes na comarca de Monterrei foi rexeitada cos votos en contra do PP. A iniciativa, defendida por Eva Pérez Gamote no seu estrear como deputada provincial, instaba á Xunta de Galicia a incluír un centro comarcal específico no Plan de Residuos de Galicia e reclamaba que a Deputación asumise a coordinación intermunicipal e prestase apoio técnico e económico mentres a infraestrutura non estivese operativa. O rexeitamento mantén a situación actual, pola que os residuos deben trasladarse a vertedoiros situados entre 80 e 120 quilómetros.
O voceiro socialista, Álvaro Vila Araújo, criticou a decisión ao afirmar que "O PP vén de darlle as costas a tres comarcas que levan anos reclamando unha solución xusta e razoable. Votar en contra desta moción é votar a favor do agravio territorial, do encarecemento das obras e dos vertidos ilegais no monte". Na mesma liña, Pérez Gamote concluíu que "Este voto do PP non é un voto calquera. É un voto contra os veciños e veciñas de Monterrei, Verín e Viana".
No turno de control, o grupo socialista formulou dúas preguntas orais. Vila Araújo solicitou información sobre as alegacións que a Deputación presentase ou teña previsto presentar ao anteproxecto de Lei de Administración Local de Galicia, actualmente en tramitación pola Xunta, co obxectivo de coñecer a posición institucional da corporación en materia de financiamento e delimitación de competencias municipais.
Pola súa banda, a deputada Sherezade Núñez Rodríguez preguntou polo estado de tramitación da convocatoria de subvencións para a rehabilitación e adquisición de vivendas destinadas ao alugueiro residencial, publicada o 5 de novembro de 2025 e dotada con 500.000 euros para concellos de menos de 20.000 habitantes. O grupo solicitou coñecer o número de solicitudes recibidas e os prazos previstos de resolución. "Os concellos precisan saber con que contan e cando. Non é razoable que unha convocatoria deste tipo permaneza durante meses sen información clara sobre a súa tramitación", concluíu Núñez Rodríguez.