Taboadela remata a actuación de humanización en Vilar para gañar accesibilidade e mellorar os servizos
O núcleo de Vilar, en Taboadela, amosa xa o resultado da actuación de humanización executada nos últimos meses, unha intervención coa que o Concello buscou mellorar o uso cotián da rúa e facilitar os desprazamentos a pé, gañando funcionalidade tanto para a veciñanza como para as persoas que visitan a zona.
A obra estivo ligada tamén á actualización de servizos básicos. En setembro de 2025, o Concello sacou a contratación a mellora da rede de saneamento de Vilar, cun orzamento de 48.000 euros financiados pola Deputación de Ourense e un prazo estimado de execución de tres meses. O proxecto incluía a instalación dunha rede unitaria de saneamento, a demolición do pavimento existente (en mal estado) e a reposición do solo con materiais como pedra granítica, ademais dunha nova base para incrementar a seguridade e accesibilidade.
Desde o ámbito municipal, esta liña de actuacións forma parte dun conxunto de melloras previstas no termo, que tamén contemplan intervencións semellantes noutros puntos do concello.