Todo listo en Barbadás para unha nova edición do Paseo Literario ‘O Piñor de Carmen Martín Gaite’
O Concello de Barbadás organiza o III Paseo Literario “O Piñor de Carmen Martín Gaite”, que se celebrará o sábado 21 de xuño a partir das 9:45 horas. Esta terceira edición será especialmente significativa, ao enmarcarse no 2025, declarado Ano Martín Gaite en Barbadás.
Como en ocasións anteriores, o paseo será guiado polo experto David G. Couso, quen achegará ás persoas participantes á vida e obra da escritora, intimamente ligada a San Lourenzo de Piñor. “Esta localidade é a capital do universo vital e literario de Carmen Martín Gaite”, lembra Ana Peleteiro, concelleira de Cultura. O prazo de inscrición estará aberto ata o 18 de xuño.
Nesta edición, os participantes recibirán un agasallo conmemorativo do Concello de Barbadás. Ademais, a xornada contará coa participación da Banda Cultural de Barbadás.
Como nas edicións anteriores, o punto de partida será o Centro Social de San Lourenzo de Piñor. Os servizos municipais de limpeza están acondicionando as zonas máis emblemáticas da localidade, onde se realizarán paradas para afondar na influencia de Piñor na vida e na obra da autora.
A tenente de alcalde, Victoria Morenza, e a concelleira de Cultura, Ana Peleteiro, mantiveron recentemente unha reunión co director xeral de Cultura da Xunta de Galicia, Anxo Lorenzo, para presentarlle o traballo de recuperación e divulgación da relación de Carmen Martín Gaite con Barbadás.
“Levamos distinta documentación do Plan Director co que xustificamos a nosa proposta de colaboración coa Consellería de Cultura no marco do centenario da autora”, explicou Peleteiro.
Durante o encontro, as edís expuxeron o traballo realizado nos últimos dous anos: dende os paseos literarios ata as actividades que poñen en valor as novelas de Martín Gaite nas que Piñor aparece como eixo literario. Tamén lle agasallaron cun exemplar do libro de David G. Couso e cunha axenda conmemorativa do Ano Carmen Martín Gaite.
Entre as propostas presentadas á Xunta, destacaron a instalación de esculturas, a sinalización do paseo literario para a súa realización permanente, a organización de exposicións fotográficas e a colaboración con institucións como a UNED ou a Universidade de Salamanca.
Anxo Lorenzo comprometeuse a apoiar as iniciativas presentadas, aínda que aínda non se concretou a fórmula de colaboración.
Por outra banda, Peleteiro e Morenza tamén se reuniron con César Fernández, vicepresidente segundo da Deputación de Ourense, para estudar posibles vías de colaboración coa entidade provincial.