Un taller de defensa persoal ensina ás enfermeiras ourensás a tratar situacións complicadas
Como afrontar situacións de risco e como responder ante posibles agresións, tanto físicas como psicolóxicas. É o obxectivo do primeiro taller de defensa persoal para enfermería impartido por instrutores da Policía Nacional e organizado en colaboración co Colexio de Enfermería de Ourense.
Un total de 30 enfermeiras de Ourense participaron nesta experiencia piloto que forma parte da planificación de formación continua do COE Ourense para as súas colexiadas. Dada a acollida por parte do colectivo enfermeiro desta iniciativa, desde a Comisión de Docencia do Colexio de Enfermería de Ourense trabállase xa na posibilidade de novas edicións, incluíndo unha próxima edición no Barco de Valdeorras.
O taller forma parte da colaboración entre Corpo Nacional de Policía e o COE Ourense. Colaboración na que se enmarca a figura do interlocutor policial sanitario, clave dentro da estratexia de prevención de agresións a profesionais sanitarios e da colaboración entre institucións.
As profesionais de enfermería son un colectivo que se ve afectado por agresións de diferente índole no exercicio da súa actividade. Situacións violentas que lles poñen en risco e poden provocar efectos nocivos tanto na seguridade e na saúde da persoa afectada como no sistema sanitario no seu conxunto. Nun sistema sanitario de alta complexidade, a seguridade persoal no exercicio profesional das máis de 1400 profesionais colexiadas en Ourense é tan relevante como a seguridade do paciente.
Segundo os datos do Observatorio de Agresións do Consello Xeral de Enfermería, durante o ano 2022 denunciáronse un total de 2.580 agresións a enfermeiras en España, das cales 188 foron rexistradas tan só en Galicia.
O Informe de Agresións a Profesionais Sanitarios do Sistema Nacional de Saúde de 2022 revela preocupantes tendencias respecto a a violencia na contorna sanitaria. Segundo o informe, o perfil do profesional agredido corresponde maioritariamente a mulleres, con notificacións predominantes entre os 35 e 55 anos, principalmente do persoal facultativo e de enfermería.