Valdorregueiro celebra as súas festas na honra de San Xosé con música e gastronomía
O barrio ourensán de Valdorregueiro celebrará do 20 ao 22 de marzo as súas festas na honra de San Xosé, cun programa que combina tradición, lecer e propostas para todas as idades.
As celebracións arrancan o venres 20 ás 20:30 horas cun concurso de tortillas e sobremesas, que incluirá degustación, música e entrega de premios. Ás 21:30 actuará o Trío Futuro e, xa de madrugada, a partir das 00:30 horas, haberá verbena con DJ Pancho.
O sábado 21 comezará cun pasarrúas tradicional ás 11:30 horas, animado por gaiteiros. Ás 14:00 horas terá lugar unha comida popular con cocido galego, cun prezo de 26 euros para adultos e 15 euros para nenos (reservas no 697 911 813). Pola tarde, ás 16:30 horas, celebrarase unha festa infantil con Yuka Animación que incluirá merenda. A xornada continuará coa actuación do Dúo Os Trasnos ás 21:30 horas e unha verbena a partir das 00:30 horas co Grupo América.
O programa rematará o domingo 22 coa procesión e misa solemne na honra de San Xosé ás 12:00 horas, que contará coa actuación do Coro de Cudeiro. Ao remate do acto relixioso, os asistentes poderán gozar dunha sesión vermú.