Voluntarias do Espazo +60 entregan almofadas de lactación confeccionadas artesanalmente ao CHUO
Voluntarias do Espazo +60 de Afundación Ourense fixeron entrega no Hospital Universitario de Ourense dun lote de almofadas de lactación confeccionadas artesanalmente nos seus obradoiros solidarios. As pezas estarán destinadas ás unidades de Obstetricia, Coidados Intensivos Pediátricos e Prematuros, co obxectivo de facilitar a lactación materna e contribuír ao descanso de nais e bebés durante o ingreso hospitalario.
Estas almofadas permiten adoptar unha postura máis ergonómica durante a lactación, reducindo a sobrecarga en brazos, costas e pescozo e favorecendo o descanso materno, especialmente necesario nos primeiros días. Así o explicou a supervisora de enfermería da UCI pediátrica e de prematuros, Teba Castro, quen salientou a utilidade deste material no acompañamento ás familias.
No marco da visita, o Servizo de Humanización da Área Sanitaria de Ourense, Verín e Valdeorras organizou unha sorpresa para as voluntarias: un percorrido guiado pola colección pictórica instalada no novo edificio de hospitalización. A visita contou cunha guía de excepción, Chus Blanco, viúva de Xaime Quessada e nai de Quesada Blanco, acompañada pola xerente da Fundación, Paula Serrano.
Máis de 25 obras de Xaime Quessada e do seu fillo Quesada Blanco forman parte desta colección, presente desde a apertura do edificio e distribuída polas plantas e a entrada principal. As pezas están cedidas en depósito de maneira altruísta pola Fundación Xaime Quesada Blanco, co propósito de contribuír á humanización dos espazos asistenciais e integrar a arte na experiencia hospitalaria.
A obra de Quessada pai, referente da plástica galega contemporánea con proxección internacional, destaca pola súa versatilidade estilística, que transita entre o figurativismo, o expresionismo e a abstracción. Pola súa banda, Quesada Blanco desenvolveu unha liña creativa propia, cun enfoque máis conceptual, en diálogo coa tradición artística familiar. Durante o percorrido, Chus Blanco compartiu detalles sobre o proceso creativo de ambos artistas e o significado das obras expostas, pertencentes a distintas etapas das súas traxectorias.
Desde o Servizo de Humanización destacaron tamén a implicación constante das voluntarias do Espazo +60, que participan activamente en numerosas iniciativas en beneficio dos pacientes.
A iniciativa exemplifica a colaboración entre institucións sociais, culturais e sanitarias para construír contornas máis humanas, nas que o coidado integral das persoas inclúe tanto a atención física e emocional como o poder transformador da arte.