Xa se pode ver en Barbadás a exposición ‘Arte e humor. O enxeño de Antonio Mingote’
Afundación e o Concello de Barbadás inauguraron hoxe a exposición ‘Arte e humor. O enxeño de Antonio Mingote’ na Sala de Exposicións da Casa da Cultura Manuel María. No acto participaron o alcalde de Barbadás, Xosé Carlos Valcárcel Doval; o coordinador institucional de ABANCA en Ourense, Mateo Alonso San Román; o director da oficina de ABANCA na Valenzá, Miguel Madriñán; e a coordinadora institucional de Afundación en Ourense e Lugo, Beatriz Fernández-Anguiano.
Organizada en colaboración coa Fundación Antonio Mingote, a mostra propón un percorrido pola historia da arte a través da ollada do recoñecido debuxante. Poderá visitarse desde o 26 de febreiro ata o 27 de marzo, de luns a venres en horario de 8:30 a 14:30 e de 16:00 a 20:00 horas.
‘Arte e humor. O enxeño de Antonio Mingote’ repasa a traxectoria dun creador que iniciou a súa carreira con apenas 13 anos, cando publicou o seu primeiro debuxo en Gente Menuda. En 1946 comezou a colaborar con La Codorniz, publicación na que traballou ata 1953. Máis tarde incorporouse ao xornal ABC, onde desenvolveu un labor continuado durante máis de medio século. Ao longo da súa carreira tamén colaborou con cabeceiras como The New York Times, The Daily Telegraph, Blanco y Negro, Semana, Ínsula ou Interviú.
Ademais da súa faceta como debuxante, Mingote exerceu como xornalista e novelista, con máis de corenta obras publicadas, e participou en proxectos de teatro, cine e televisión. A súa traxectoria foi recoñecida con numerosos galardóns e distincións, entre eles o feito de converterse no primeiro debuxante membro da Real Academia Española (RAE). Recibiu, entre outros recoñecementos, a Cruz de Cabaleiro da Orde de Isabel a Católica, o Premio Nacional de Xornalismo en 1980, a Medalla de Ouro do Concello de Madrid en 1995, a Medalla de Ouro ao Mérito no Traballo en 1996 e doutoramentos honoris causa polas universidades de Alcalá de Henares e Rey Juan Carlos.
A exposición forma parte do proxecto «Corrente cultural», unha iniciativa que entende a arte como ferramenta para fomentar o coñecemento e o desenvolvemento colectivo. A través deste programa, Afundación, a Obra Social de ABANCA, busca estender a actividade cultural por toda Galicia, achegando propostas artísticas a distintos municipios galegos máis alá das súas sedes habituais.