A celebración da “Noite do Medo – Halloween Ourense 2025” provocará cortes de tráfico e cambios nos autobuses
A celebración da “Noite do Medo – Halloween Ourense 2025” obrigará a aplicar diversas restricións de tráfico este venres no centro de Ourense, debido ao desenvolvemento do programa de actividades e do tradicional desfile que percorrerá as principais rúas.
Segundo informou o Concello de Ourense, a rúa do Progreso permanecerá pechada ao tráfico desde as 11:00 da mañá no tramo comprendido entre a rotonda de San Rosendo e o acceso á Alameda. A partir das 13:30 horas, só se permitirá o paso desde a rúa Concordia ata a rúa do Paseo a residentes e usuarios de garaxes.
A rúa do Paseo quedará completamente pechada á circulación desde as 19:00 horas e ata a finalización do desfile. Outras vías da contorna, a maioría situadas no casco histórico e na zona peonil, tamén permanecerán cortadas ao tráfico a partir das 17:00 horas.
Os cortes de tráfico na rúa do Progreso afectarán tamén ao servizo de autobuses urbanos, que modificarán as súas rutas habituais desde as 11:00 da mañá ata as 5:00 horas do sábado, 1 de novembro.
En dirección ao Xardín do Posío, os autobuses circularán por Xoán XXIII (Abanca), Rúa Concello, Bedoya, Avenida de Bos Aires, Xoán de Novoa, Emilia Pardo Bazán e Pena Trevinca.
En sentido cara ao Parque de San Lázaro, o percorrido variará segundo o horario. Ata aproximadamente as 21:00 horas, as liñas seguirán o itinerario Xardín Posío – Alameda – Doutor Fleming – parada Justel – Progreso (parada provisional en Inorde) – Xoán XXIII – Parque de San Lázaro.
A partir das 21:00 horas, o traxecto será Xardín Posío – Pena Trevinca – Avenida da Habana – Parque de San Lázaro.