A CEO reclama medidas de protección e compensación para os gandeiros afectados polo acordo UE–Mercosur
A Confederación Empresarial de Ourense (CEO) reclama mecanismos de protección, compensación e axuste para os sectores que resulten prexudicados pola aplicación do acordo UE–Mercosur, e manifesta o seu apoio ao sector primario ourensán ante a preocupación xerada por este acordo comercial e as mobilizacións convocadas por agricultores e gandeiros en distintos puntos de España que tiveron un grande impacto na provincia.
Entre as medidas propostas pola CEO están incluídas axudas directas, fondos de compensación, cláusulas de salvagarda e un reforzo efectivo dos controis sobre os produtos importados. Dende a Confederación defenden “a neutralidade respecto dos sectores que están a favor do acordo, pero a firmeza na defensa urxente e necesaria daqueles que poden verse gravemente afectados”, e tamén insisten en que “non se pode permitir que a apertura de novos mercados se faga a costa de debilitar un sector primario que é estratéxico, sostible e esencial para o desenvolvemento económico e a cohesión territorial da nosa provincia”.
Sinalan que, como ocorre con calquera grande acordo internacional, o tratado con Mercosur presenta impactos desiguais segundo os sectores produtivos. Así, explican, mentres determinadas actividades dentro deste sector valoran positivamente a eliminación de aranceis e a apertura dun mercado potencial de preto de 700 millóns de consumidores, unha parte moi significativa da produción agraria e gandeira do noso país expresa o seu rexeitamento polas consecuencias que pode ter en termos de competencia, prezos e viabilidade das explotacións.
Por iso, dende a CEO consideran necesario abordar este debate “desde unha posición responsable e equilibrada”, e insisten en que non están en contra da apertura de mercados nin dos acordos comerciais internacionais que, lembran, poden supoñer oportunidades de crecemento e expansión para parte do tecido produtivo, senón que entenden que “non se pode avanzar na liberalización comercial sen garantir condicións de competencia xustas e equilibradas”.
Neste sentido, un dos principais puntos de conflito e discusión do acordo con Mercosur é a entrada de produtos agroganadeiros sen aranceis, pero tamén sen os mesmos estándares sanitarios, medioambientais e laborais que se esixen aos produtores europeos. Esta situación, explican, xera unha clara desvantaxe competitiva para o sector primario, especialmente en territorios como a provincia de Ourense, onde a agricultura e a gandería teñen un peso económico, social e territorial fundamental.
Por iso, reclaman ás autoridades competentes que se establezan medidas de protección e compensación para un sector especialmente relevante na provincia, e manifestan a súa defensa dun modelo “equilibrado, que xere oportunidades, pero que tamén protexa e compense adecuadamente a aqueles que soportan os maiores custos destes acordos”.