Actualidade

A obra, cuxo contrato foi licitado o pasado 7 de novembro por un importe de 1,5 millóns de euros, busca crear un itinerario peonil continuo de case 2,7 quilómetros pola marxe dereita da estrada

A Consellería de Vivenda e Planificación de Infraestruturas, a través da Axencia Galega de Infraestruturas, publicou no Diario Oficial de Galicia a convocatoria para os actos expropiatorios relacionados coa construción dunha nova senda peonil na estrada OU-402, no barrio de Reza, Ourense. Estas actuacións están previstas para xaneiro e marzo de 2026.

A obra pretende crear un itinerario peonil continuo de case 2,7 quilómetros pola marxe dereita da estrada, conectando treitos illados de beirarrúas e edificacións dispersas para facilitar desprazamentos máis seguros e cómodos aos veciños.

Os actos para o levantamento das actas previas realizaranse os días 27 e 28 de xaneiro, mentres que a formalización das actas de ocupación está prevista para os días 17 e 18 de marzo, ambos no Concello de Ourense.

O trazado da nova senda estenderase desde a intersección coa rúa Portalón ata o aparcadoiro situado no quilómetro 3+290. Ademais, levaranse a cabo intervencións puntuais na marxe esquerda, relacionadas coa nova ubicación dos pasos de peóns e das paradas de autobús, que tamén se reubicarán para facilitar o acceso e evitar interrupcións.

A senda terá un ancho variable, entre 1,8 e 3 metros, segundo as características das edificacións adxacentes, respectando en todo momento as peticións realizadas polos veciños para minimizar o impacto sobre as propiedades limítrofes. Tamén se axustará lixeiramente o trazado da estrada nun treito para evitar afectar aos peches.

As obras incluirán a mellora dos drenaxes, a instalación previa de canalizacións para servizos, a construción de muros de contención e a mellora da sinalización. Paralelamente, crearase zonas de aparcadoiro en liña para evitar que os vehículos invadan o percorrido peonil.

Esta actuación forma parte do esforzo da Xunta para completar máis de 16 quilómetros de sendas nas estradas autonómicas da comarca de Ourense, cun investimento total próximo aos 8 millóns de euros. Ademais, súmase ao proxecto dunha nova senda peonil e ciclista que conectará de norte a sur a cidade, pasando por puntos clave como a estación intermodal, a Ponte Vella e Expourense.

O Goberno galego continúa así impulsando unha rede viaria máis segura e cómoda, orientada a fomentar unha mobilidade sostible.