A Deputación de Ourense lanza “Termalismo con Estrelas”, un programa que une balnearios e gastronomía
A Deputación de Ourense presenta un novo programa turístico que combina dous dos recursos máis destacados da provincia: o sector termal e a gastronomía de alta calidade. Baixo o nome “Termalismo con Estrelas”, a iniciativa propón estancias en balnearios acompañadas da experiencia culinaria ofrecida polos tres restaurantes con Estrela Michelín da provincia: Miguel González, Nova e Ceibe.
O programa foi presentado esta mañá na Oficina Termal AVE, situada na estación intermodal de Ourense, única en España, e que recibe visitantes interesados na oferta balnearia ourensá; desde a súa inauguración hai un ano, preto de 60.000 persoas pasaron por este espazo. Durante a presentación, o presidente da Deputación, Luis Menor, agradeceu a disposición dos restauradores a complementar o termalismo coa “excelente” cociña e destacou que a iniciativa suporá “a fusión de dous recursos cabeceira da marca turística ourensá”. Segundo Menor, o programa reflicte que “non deixamos de explotar e explorar un dos eixos estratéxicos da nosa provincia como é o sector termal” e animou á participación para vivir unha experiencia que amosa o compromiso da Deputación con “un destino turístico sostible de calidade e único”.
Cada un dos restaurantes participantes deseñou un menú específico para esta primeira experiencia piloto, mantendo a esencia da súa oferta habitual. O restaurante Miguel González ofrecerá o menú “Auria”, centrado en “recordos, sensacións e técnicas” e baseado na elección de produtos que chegan do mercado, da lonxa ou do campesiño, sen garantir que se repita ningún día.
No caso de Ceibe, a proposta chamada “Enxebre” aposta por materia prima de proximidade e de tempada, mantendo as bases tradicionais da súa cociña e o vínculo coa cultura gastronómica galega.
Pola súa banda, o restaurante Nova optou por un menú homónimo, que busca plasmar as raíces culinarias da provincia e destaca pola frescura dos ingredientes e o respecto á base gastronómica herdada de xeracións anteriores.
A primeira quenda piloto de “Termalismo con Estrelas” terá lugar do 16 ao 21 de marzo, cun máximo de 40 participantes para garantir que a experiencia sexa o máis personalizada posible. A estancia de seis días e cinco noites incluirá pensión completa, acceso a dez técnicas termais, piscinas de auga mineromedicinal e asesoramento médico voluntario, así como as comidas nos restaurantes Miguel González, Nova e Ceibe, programadas para martes, mércores e xoves. Tras esta quenda inicial, a Deputación analizará a resposta dos participantes para programar futuras edicións. As reservas abriranse este venres ás 10.00 horas a través da web termalismoourense.com.