A Deputación e a Federación Galega de Automobilismo impulsan un programa para promocionar os rallys na provincia
A Deputación de Ourense e a Federación Galega de Automobilismo impulsan o programa “Motor Futuro” co obxectivo de promocionar a modalidade de rallys entre a mocidade e atopar novos talentos na provincia de Ourense, no marco do Campionato Xunta de Galicia-Recalvi da tempada 2025.
O presidente provincial, Luis Menor, e o presidente da Federación Galega de Automobilismo, Antonio Rodríguez Troitiño, acompañados polo presidente da Escudería Ourense, Jano Fraga, presentaron hoxe os detalles desta iniciativa, que inclúe actividades de formación, a primeira delas en maio no Centro Cultural Marcos Valcárcel en torno á cronometraxe; promoción do deporte do motor en centros educativos da provincia; e unha bolsa para un deportista.
Precisamente no inicio deste programa, o presidente provincial tivo ocasión de coñecer o vehículo que conducirá a persoa gañadora da bolsa -construído por Javier López de Past Autos racing- e co participará na Sandero ECO Cup Galicia, un formato promocional integrado no campionato galego e que, ademais, será o primeiro en equipar combustible ecolóxico GLP, reducindo así o impacto medioambiental deste deporte.
Luis Menor valorou positivamente este programa polo seu obxectivo á hora de captar novos talentos, dado que se procura “a proxección dunha promesa moza da provincia no eido automobilístico, creando unha canteira de deportistas co propósito de chegar a probas nacionais ou internacionais con garantías”.
Aberto o prazo de inscrición para a bolsa
Para optar a esta primeira bolsa Motor Futuro, as bases establecen que os candidatos deben ter entre 18 e 24 anos e estar censados en calquera dos concellos da provincia de Ourense. Non poderán ser campións nacionais ou internacionais e a nivel autonómico só se admite ser campión dun certame absoluto en karting e autocross.
Con 30 prazas dispoñibles, este luns quedou aberto o prazo de inscrición que permanecerá aberto ata o 9 de abril. A primeira fase de selección será por rigorosa orde de chagada das solicitudes. As trinta promesas seleccionadas formarán parte das probas eliminatorias que se celebrarán o 13 de abril, recibindo antes un curso teórico e práctico impartido por monitores especializados.