A Deputación e a UVigo afondan en Ourense na importancia da saúde mental na mocidade
O Centro Cultural Marcos Valcárcel acolle, ata o 25 de setembro, a celebración dun curso centrado na visibilización da importancia da saúde mental na mocidade dirixido por María Teresa Barge, deputada de Xuventude e Igualdade de Ourense, e José María Faílde, profesor da Facultade de Educación e Traballo Social .
A iniciativa, explican desde a UVigo, enmárcase na programación de cursos de extensión universitaria, os chamados cursos de verán, organizados pola Vicerreitoría do campus con financiamento da Deputación de Ourense.
O obxectivo principal desta formación é, tal e como explican os seus responsables, explorar e visibilizar a importancia da saúde mental na mocidade. Nas súas sesións búscase proporcionar ás persoas asistentes “ferramentas e coñecementos clave, como a identificación de factores de risco, a promoción da resiliencia e o autocoidado para comprender, previr e abordar os problemas relacionados coa saúde mental na mocidade”. O avance da sociedade e os cambios nos estilos de vida, lembran desde a organización da actividade, “traen como consecuencia que durante os últimos anos a mocidade teña que enfrontarse a unha serie de retos e presións que poden afectar significativamente o seu benestar psicolóxico”.