Actualidade

“A votación é lexitima, pese ao que algúns queiran facer crer, e non se vai a repetir”, asegura a presidenta do comité de empresa, Adelina Basteiro

Este xoves, tras unha reunión entre os traballadores de limpeza e os sindicatos, o persoal do servizo votou en contra do preacordo presentado polos representantes sindicais.

Fixérono cun reconto de 75 votos a favor e 25 en contra, tal e como confirma a presidenta do comité de empresa, Adelina Basteiro, que apunta, ademais, que “houbo moitas persoas que tiveron que marchar porque xa era moi tarde” e que 65 representantes da CIG non puideron estar presentes pola hora do encontro. Basteiro asegura que dende a CIG trasladáronlle o seu apoio ao longo da tarde, polo que “puideron haber moitos máis votos a favor”, así como tamén o fixo UGT, que se mantén firme na súa postura de apoiar o que decida a maioría da asemblea.

A presidenta do comité de empresa responde así á postura de CCOO, que cuestionou a votación por terse realizado a man alzada e non en urna. Unha votación na que, insiste, “o que se votaba era o preacordo, non a folga, que xa foi votada semanas atrás”. Así, en contra do que sinalan algunhas informacións, a votación non se vai repetir, afirma contundente. “Poden impugnala se queren, pero a votación foi totalmente lexítima”. Basteiro explica que a negociación continúa este venres, pero asegura que a falta de tempo fai moi difícil que a situación vaia cambiar antes do sábado.

Ademais, respecto á tensión vivida durante toda a negociación, Basteiro critica directamente a actitude do delgado de CCOO e denuncia que “os propios compañeiros da CIG sentíronse ameazados”.

Así, a presidenta do comité de empresa amósase contundente ao afirmar que “a folga do lixo segue en pé” e que “a votación é lexitima, pese ao que algúns queiran facer crer, e non se vai a repetir”.

Ademais, en contra da postura de CCOO, que pide que a votación se repita nas urnas en lugar de a man alzada, sinalando que iso puido condicionar os resultados, a presidenta do comité de empresa sostén que, pola contra, podería haber habido máis votos a favor se a votación fose secreta.

O que, polo de agora, queda claro é que hoxe é o último día para negociar antes do inicio da folga e que as posibilidades de que poida aprazarse ou, incluso, desconvocarse dependerán do que aconteza nas próximas horas.