A Operación Quilo 2024 logrou recadar máis de 8.000 quilos de alimentos
A Asociación Amencer vén de pechar un ano máis a súa ‘Operación Quilo’, unha iniciativa solidaria que cumpriu 38 anos este 2024 cun gran éxito de participación e que hoxe está a repartir todos os beneficios entre as Cáritas de Ourense.
Na campaña deste ano, que hoxe está a repartir todo o recadado durante as pasadas semanas, participaron máis de 200 comercios e foron instalados 74 puntos de recollida con un total de 83 caixas para recadar alimentos e xoguetes.
Ademais, organizáronse dúas recollidas intensivas en supermercados, 12 eventos deportivos, tres sorteos e catro actividades escolares, todas elas con fins solidarios, así como dúas ‘básculas viaxeiras’ e tres recollidas en tres centros educativos.
Outra das actuacións que se levaron a cabo nesta campaña foi a de ‘Peso X Quilos’, a través da cal representantes de distintas institucións públicas e privadas doaron o seu peso en Quilos, favorecendo a concienciación social e a promoción da campaña. Participaron 43 representantes de 32 entidades e conseguíronse 3.415 kg de alimentos únicamente con esta initciativa.
Na Operación Quilo 2024 participaron 321 mozos e mozas da Asociación Xuvenil Amencer, e 865 adultos dende mediados de novembro ate finais de decembro.
En total, a campaña deste ano logrou recadar 8.159 quilos de alimentos, 4.200 quilos de xoguetes e 6.200 quilos de roupa. Ademais, recadáronse tamén un total de 9.809 euros, cartos que foron destinados na súa totalidade a merca de alimentos.