A ourensá Támara Echegoyen representará este venres a España na cerimonia inaugural dos Xogos de París 2024
A deportista ourensá, Támara Echegoyen, será a encargada de portar a bandeira de España na cerimonia inaugural dos Xogos Olímpicos de París 2024 que terá lugar este venres, 26 de xullo, ás 19.30 horas.
Xunto ao piragüista Marcus Cooper Walz, a regatista nacida en Ourense foi elixida polo Comité Olímpico Español (COE) como abandeirada da delegación española pola súa excelente traxectoria deportiva.
Echegoyen, nacida en 1984, foi campiona olímpica nos Xogos de Londres 2012, na categoría Elliott 6m, xunto ás regatistas Ángela Pumariega e Sofía Toro. En 2016, obtivo a cuarta posición nos Xogos Olímpicos de Río de Janeiro, ao igual que o fixo en Tokio 2020.
Ademais, entre os anos 2016 e 2022, a regatista gañou tres medallas no Campionato Mundial de 49er, e conseguiu un ouro no Campionato Mundial de Match Race de 2013 e outro no Campionato Europeo de Elliott 6m de 2011.